अछाम- एमाले अछाम जिल्ला पार्टी उपाध्यक्ष तिलक कुँवरले चुनावी घरदैलोका क्रममा जनताबाट सोचेभन्दा बढी माया पाएको बताएका छन् ।
जिल्लाको रामारोशन गाउँपालिका-७ सुतारमा घरदैलो कार्यक्रममा बोल्दै उनलेे यस्तो बताएका हुन् ।
कुँवरले विगत २० वर्षदेखि निरन्तर जित्दै आएका नेताहरू जनअपेक्षित काम गर्न असफल भएको आरोप लगाए ।
उनले भने,“बारम्बार जित्दै आएका नेताहरू जनताको दुःख, पीडा र मागको पक्षमा उभिएको देखिएन । जनभावनामा लात हान्दै हिँडेकाहरूलाई होइन, अब नयाँ उम्मेदवारलाई अवसर दिनुपर्ने समय आएको छ ।”
कुँवरले अछाम क्षेत्र नं. १ का एमाले उम्मेदवार दिपक साउँद कुनै पदमा नहुँदा पनि जिल्लाको शिक्षा, स्वास्थ्य, खेलकुद र सडक सञ्जाल विकासमा महत्वपूर्ण योगदान दिएको उल्लेख गरे ।
“पदमा नभएर पनि जिल्लाका लागि काम गर्ने नेता नै आजको आवश्यकता हो,” भन्दै उनले साउँदको कार्यसम्पादनको खुलेर प्रशंसा गरे ।
उनले उपस्थित जनसमुदायसँग सूर्य चिन्हमा भोट हालेर दिपक साउँदलाई विजयी गराउन अपिल गर्दै, एमालेको जित सुनिश्चित भएको दाबी गरे ।
घरदैलो कार्यक्रममा स्थानीयको उल्लेखनीय सहभागिता रहेको जनाउँदै कुँवरले भने,
“जनता एमाले र दिपक साउँदप्रति सकारात्मक छन् । अब हाम्रो जितलाई कसैले रोक्न सक्दैन।
त्यस्तै कुँवरले झुटो प्रचारप्रसार लिएर तिनै जनअपेक्षित कार्य नगर्ने मान्छे आउने हुँदा नागरिकलाई सजग रहन आग्रह समेत गरेका छन्।
कार्यक्रममा जनसमुदायको उत्साह र समर्थनले चुनावी माहोल थप तातेको स्थानीयले बताएका छन् ।
