धनगढी- अछामको रामारोशन गाउँपालिकामा नेकपा माओवादी केन्द्रको प्रभाव कमजोर बन्दै गएको संकेत देखिएको छ। माओवादी केन्द्रबाट निर्वाचित तीन जना वडा अध्यक्षले पार्टी परित्याग गर्दै प्रगतिशील लोकतान्त्रिक पार्टीमा प्रवेश गरेका छन्।
रामारोशन गाउँपालिका वडा नम्बर १, २ र ६ का वडा अध्यक्षहरू क्रमशः चक्र साउँद, मीनबहादुर परियार र सुशील साउँद प्रगतिशील लोकतान्त्रिक पार्टीमा आबद्ध भएका हुन्।
नेकपा माओवादी केन्द्रबाट अलग्गिएर गठन भएको प्रगतिशील लोकतान्त्रिक पार्टीले अछाममा माओवादीको परम्परागत प्रभाव क्षेत्र कमजोर पार्दै अघि बढिरहेको चर्चा स्थानीय राजनीतिक वृत्तमा चल्न थालेको छ।
प्रगतिशील लोकतान्त्रिक पार्टीका केन्द्रीय सदस्य दीपक साउँदका अनुसार नवप्रवेशी वडा अध्यक्षहरूलाई पार्टीको प्रदेश समिति सदस्यको जिम्मेवारीसमेत दिइएको छ।
साउँदले जनाएअनुसार अछाम जिल्लाका जनयुद्धका बन्दी परिवार, सहिद परिवार तथा घाइते परिवारहरूले समेत प्रगतिशील लोकतान्त्रिक पार्टीलाई सहयोग गर्ने प्रतिबद्धता जनाएका छन्।
यस घटनाक्रमले आगामी दिनमा अछाम जिल्लाको राजनीतिक समीकरणमा उल्लेखनीय परिवर्तन आउन सक्ने संकेत देखिएको छ।
Advertisement
