कैलाली : धनगढीस्थित नेपाल वेस्टर्न एकेडेमी (NWA) मा अध्ययनरत बिएचएम कार्यक्रमका विद्यार्थीहरूले जापानको राजधानी टोकियोमा एक वर्षे तलबसहितको इन्टर्नसिप अवसर प्राप्त गरेका छन् । इन्टर्नसिप सहित खाना र बसोबासको सुविधा संगै विद्यार्थीहरूले मासिक दुई लाख रुपैयाँभन्दा बढी आम्दानी गर्न सक्ने गरी इन्टर्नसिपमा सहभागी हुन पाएका छन ।
कलेज प्रशासनका अनुसार, विद्यार्थीहरूलाई विश्वस्तरीय होटल तथा आतिथ्य व्यवस्थापन क्षेत्रमा प्रत्यक्ष कार्यअनुभव दिलाउने उद्देश्यले यो कार्यक्रम सञ्चालन गरिएको हो । यस अवसरले विद्यार्थीहरूको व्यावसायिक सीप, कार्यअनुशासन र अन्तर्राष्ट्रिय कार्यसंस्कृतिसँग प्रत्यक्ष साक्षात्कार गराउने अपेक्षा गरिएको छ ।
नेपाल वेस्टर्न एकेडेमीका प्रबन्धक शैलेस सिंह ले यो उपलब्धिलाई कलेजका लागि मात्र नभई सुदूरपश्चिम प्रदेशकै लागि महत्वपूर्ण उपलब्धिका रूपमा उल्लेख गरेका छन् । उनले भने “बिएचएम कार्यक्रमअन्तर्गत विद्यार्थीहरूले प्राप्त गरेको यो अवसर उनीहरूको मेहनत, अनुशासन र कलेजले प्रदान गर्दै आएको गुणस्तरीय शिक्षाको परिणाम हो । जापान जस्तो विकसित देशमा तलबसहित इन्टर्नसिप पाउनु ठूलो अवसर हो, जसले विद्यार्थीको करियरलाई अन्तर्राष्ट्रिय स्तरमा अगाडि बढाउन सहयोग गर्छ।”
उनका अनुसार, नेपाल वेस्टर्न एकेडेमी सम्भवतः सुदूरपश्चिम प्रदेशकै पहिलो क्याम्पस हो, जहाँबाट बिएचएमका विद्यार्थीहरूलाई यसरी तलबसहित जापान पठाउन सफल भएको छ । यसले प्रदेशका अन्य विद्यार्थीहरूलाई पनि स्वदेशमै गुणस्तरीय शिक्षा हासिल गरी अन्तर्राष्ट्रिय अवसरसम्म पुग्न सकिने सन्देश दिएको उनले बताए ।
इन्टर्नसिप अवधिभर विद्यार्थीहरूले होटल तथा आतिथ्य व्यवस्थापनसम्बन्धी विभिन्न विभागमा काम गर्दै व्यावहारिक ज्ञान हासिल गर्नेछन् । यसबाट उनीहरूको भविष्यमा अन्तर्राष्ट्रिय रोजगारी र उच्च अध्ययनका अवसरहरू समेत खुल्ने विश्वास कलेज प्रशासनको छ ।
कलेज प्रशासनले आगामी दिनमा पनि यस्ता अन्तर्राष्ट्रिय सहकार्यलाई निरन्तरता दिने र विद्यार्थीहरूलाई अध्ययनसँगै कामको अवसर दिलाउने कार्यक्रम विस्तार गर्ने जनाएको छ ।
