बझाङ- बझाङमा सुदूरपश्चिमाञ्चल साहित्य समाजको शाखा बिस्तार तथा रचना वाचन कार्यक्रम सम्पन्न भएको छ ।
जिल्लाको केदारस्यूँ गाउँपालिका-१ स्थित गर्जेपानी माध्यमिक विद्यालय रायलमा आज सुदूरपश्चिमाञ्चल साहित्य समाजको शाखा बिस्तार तथा रचना वाचन कार्यक्रम सम्पन्न भएको हो ।
“बझाङको साहित्य, भाषा, संस्कृति र सिर्जनशील प्रतिभालाई पहिचान, संरक्षण र प्रवर्द्धन गर्दै साहित्यलाई समाज विकास र सांस्कृतिक पहिचानसँग जोड्न समाजले शाखा बिस्तार तथा रचना वाचन कार्यक्रम आयोजना गरेको जनाएको छ ।
कार्यक्रमबाट सुदूरपश्चिमाञ्चल साहित्य समाज बझाङ शाखा बिस्तार गरिएको छ । साहित्यकार पूर्णबहादुर मल्लको संयोजकत्वमा ११ सदस्यीय शाखा बिस्तार गरिएको हो । समिति सचिवमा शैलेन्द्र बहादुर सिंह,सदस्यमा विकास थापा (युनिक विवेक) गोकुल जोशी, मीना मल्ल, दिप सुस्केरा (दिपक बोहरा ) , मुकेश खाती, वीर विकल धामी ,लख्खु सिंह ,नरबहादुर भण्डारी (नवप्रगति) र प्रेम बिष्ट रहेका छन् ।
जिल्ला स्थित साहित्य लेखनमा कलम चलाउने र रुचि राख्ने व्यक्तिहरू सहभागी रहेको कार्यक्रममा गजल, मुक्तक, कविता, देउडा विधामा वाचन गरिएको थियोे । यस क्रममा सहभागी साहित्यकारहरूले आ–आफ्नो सिर्जनालाई प्रस्तुत गर्दै साहित्य केवल मनोरञ्जन नभई सामाजिक चेतना, सांस्कृतिक पहिचान र सामुदायिक एकताको माध्यम पनि हो भन्ने विषयमा जोड दिए। स्थानीय भाषा जगेर्ना कार्यक्रमको मूल पक्ष रहेको भन्दै अधिकांश रचनाहरू स्थानीय भाषामा प्रस्तुत भएका थिए।
“साहित्यिक सिर्जनालाई अभिव्यक्त गर्ने, स्रष्टाहरूबीच आपसी प्रेरणा र संवाद बढाउने तथा साहित्यिक चेतना र रुचिको विकास गर्न रचना वाचन गरिएको समाजका संयोजक मल्लले जानकारी दिए ।
विस्तारित समितिले महिनामा एकपटक नियमित रूपमा रचना वाचन कार्यक्रम सञ्चालन गर्ने निर्णय गरेको छ। साथै विद्यालय, स्थानीय समुदाय तथा सांस्कृतिक समूहहरूसँग सहकार्य गर्दै साहित्यिक गतिविधिलाई गाउँस्तरदेखि जिल्ला तहसम्म सक्रिय बनाइने प्रतिबद्धता पनि व्यक्त गरेको छ।
कार्यक्रम पूर्णबहादुर मल्लको संयोजकत्व, र शैलेन्द्र बहादुर सिंहको सह-संयोजकत्वमा आयोजना गरिएको थियोे । प्रमुख अतिथि गर्जेपानी माध्यमिक विद्यालयका प्रधानाध्यापक डम्बरबहादुर मल्ल रहनु भएको कार्यक्रममा जिल्ला स्थित साहित्यकार तथा साहित्यमा रुचि राख्नेहरूको उल्लेखनीय उपस्थिति रहेको थियोे , भने कार्यक्रम शिक्षक तथा साहित्यकार नारायण मल्लले गर्नुभएको थियोे ।
