काठमाण्डौ- नेकपा माओवादी केन्द्र, नेकपा (एकीकृत समाजवादी) लगायत आठ कम्युनिस्ट पार्टीहरूले पार्टी एकता गर्ने निर्णय गरेका छन्। माओवादीका अध्यक्ष पुष्पकमल दाहाल ‘प्रचण्ड’ संयोजक र एकीकृत समाजवादीका अध्यक्ष माधवकुमार नेपाल सह–संयोजक हुने गरी एकता गर्ने सहमति भएको हो।
माओवादी र एकीकृत समाजवादीभित्र एकताबारे फरक मत रहे पनि हिजो साँझ १८ बुँदे एकता सहमतिपत्रमा हस्ताक्षर गरिएको छ। पार्टीको नाम भने टुंगो लाग्न बाँकी छ, तर चुनाव चिन्ह पाँचकुने तारा हुने सहमति भएको बताइएको छ।
सहमति पत्रमा माओवादी केन्द्र, एकीकृत समाजवादी, नेपाल समाजवादी पार्टी, नेकपा (समाजवादी), जनता समाजवादी पार्टी नेपाल, नेकपा (माओवादी- समाजवादी), नेकपा (चिरन पुन) र नेकपा (साम्यवादी) का नेताहरूले हस्ताक्षर गरेका छन्।
एकता राष्ट्रिय सम्मेलन आउँदो १९ गते आयोजना हुने भएको छ। सम्मेलनबाट पार्टी एकताको औपचारिक घोषणा, घोषणा पत्र र अन्तरिम विधान पारित गर्ने तथा केन्द्रीय समिति गठनलगायतका निर्णय गरिने जनाइएको छ।
पार्टीको मार्गनिर्देशक सिद्धान्त माक्र्सवाद- लेनिनवाद रहने र नेपाली विशेषताअनुसार वैज्ञानिक समाजवादमार्फत समाजवादको आधार तयार गर्ने उल्लेख सहमतिपत्रमा गरिएको छ। साथै, पुँजीवादी जनवादी क्रान्तिका उपलब्धिहरूको रक्षा, राष्ट्रिय स्वाधीनता, सुशासन, सामाजिक न्याय र आर्थिक रुपान्तरणलाई प्राथमिकता दिने नीति तय गरिएको छ।
