बझाङ- नेकपा (एकीकृत समाजवादी) भित्र देखिएको असन्तुष्टि र सम्भावित फुटबारे बझाङको केदारस्युँ गाउँपालिका अध्यक्ष गणेशबहादुर बोहराले गम्भीर प्रतिक्रिया व्यक्त गरेका छन्।
फेसबुकमार्फत विचार व्यक्त गर्दै उनले नेपाली कम्युनिस्ट आन्दोलन केवल विचारको इतिहास नभई “रगत, आँसु, जेल, बन्दूक, भूमिगत जीवन र हजारौं बलिदानको इतिहास” भएको उल्लेख गरेका छन्।
उनका अनुसार हाल देखिएको विवाद केवल एउटा दलको संकट होइन, सम्पूर्ण वाम आन्दोलनकै भविष्यसँग जोडिएको चिन्ताको विषय हो। बोहराले पार्टी नेतृत्वबीच गहिरो सहमति, समन्वय र आत्मसमिक्षा हुनुपर्ने आवश्यकता औंल्याए।
“माओवादीसँग एकता गर्ने कि एमाले फर्कने भन्ने नाममा तल्लो तहका कार्यकर्ताबीच कटाक्ष र दोषारोपण हुनु दुर्भाग्यपूर्ण हो,” उनले लेखेका छन्, “यस्तो प्रवृत्तिले हामीजस्ता इमानदार कार्यकर्ता र कम्युनिस्ट आन्दोलनप्रति समर्पित युवाको मनोबल कमजोर पार्दैछ।”
बोहराले आफू र सहकर्मी कार्यकर्ताहरूले पद वा शक्ति नभई विचार, चरित्र र भविष्य सुरक्षित गर्ने नेतृत्व खोजिरहेको स्पष्ट पारेका छन्।
उनले अगाडि लेखेका छन्, “हामी फुट होइन, एकीकृत र अनुशासित कम्युनिस्ट आन्दोलन चाहन्छौं। हामी अझै पनि समाजवादको यात्रामा अडिग छौं, संघर्षको बाटोमा थाकेका छैनौं, निराश छैनौं, हार मानेका छैनौं।”
उनको भनाइअनुसार, कार्यकर्ताहरू अझै पनि वाम एकता र समाजवादी आन्दोलनको भविष्यप्रति विश्वास राख्दै संगठित, सचेत र अडिग रूपमा उभिएका छन्।
