देउरा- बझाङमा पश्चिम सेती जलविद्युत परियोजना अन्तर्गत पश्चिम सेती सरोकार समाजको बैठक बसेको छ ।
केदारस्यूँ गाउँपालिका-१ देउरमा मंगलबार वातावरणीय प्रभाव मुल्यांकन सम्बन्धि रिपोर्ट संकलन लगायतका बिषयमा छलफल गर्न बैठक बसेको हो ।
समाजका अध्यक्ष इन्द्रबहादुर भण्डारीको अध्यक्षतामा बसेको बैठकले तथ्यांक संकलन, सेयर वितरण र सार्वजनिक सुनुवाइ सम्बन्धि छलफल गरेको जनाइएको छ।
भारतीय कम्पनी एनएचपीसी इन्डिया लिमिटेडले निर्माण गर्ने पश्चिम सेती जलविद्युत परियोजनाको वातावरणीय अध्ययन गरि डिपिआर(DPR) निर्माणका लागि आयोजनाबाट प्रभावित क्षेत्रको तथ्यांक संकलन गरिने भएको छ । उक्त क्षेत्रमा रहेका आर्थिक,भौतिक, सांस्कृतिक, धार्मिक, जल, वातावरणफ जंगल,बाटोघाटो,बिरुवा, जग्गाजमिन गरि सबै पक्षको तथ्यांक संकलन गर्नुपर्ने निर्णय बैठकले गरेको छ ।
प्रभावित क्षेत्रमा केदारस्यूँ गाउँपालिका वडा नं १, २ थलारा गाउँपालिका वडा नं १,२ र बित्थडचिर गाउँपालिका वडा नं ९ रहेका छन् ।
प्रभावित क्षेत्रका बासिन्दाहरूको २० प्रतिशत सेयर निर्माण कम्पनीले प्रत्येक व्यक्तिको नाममा नि:शुल्क राखिदिनुपर्ने निर्णय पनि गरिएको छ ।
त्यस्तै सार्वजनिक सुनुवाइ गर्ने समयमा परियोजनाको विवरण सहितको प्रस्तुतीकरण गरिसार्वजनिक सुनुवाइको बाँकी अंक अगाडि बढाउने निर्णय समेत गरिएको हो ।
समाजका अध्यक्ष भण्डारीको अध्यक्षता सुरुभएको कार्यक्रममा पूर्व संविधानसभा सदस्य शंकर खड्का प्रमुख अतिथि रहनुभएको थियोे, भने केदारस्यूँ गाउँपालिका अध्यक्ष गणेश बहादुर बोहरा विशिष्ट अतिथि रहनुभएको थियोे ।
कार्यक्रमको सुरुमै कम्पनीको तर्फबाट आएका दिनेश चन्द्र जोशीले कम्पनी र कार्यक्रमको उद्देश्यबारे जानकारी गराएका थिए। त्यसपछि प्रभावित क्षेत्रका व्यक्तिहरूले विभिन्न मागहरू जस्तैः रोजगारी, पुनर्बास, सेयर वितरण तथा मुआब्जासम्बन्धी कुरा राखेका थिए।
कार्यक्रममा बोल्दै गाउँपालिका अध्यक्ष बोहराले प्रभावित क्षेत्रका वासिन्दाहरूका मागहरू सम्बोधन गर्न सबै पक्ष एकजुट हुनुपर्ने बताए । उनलेे तथ्याङ्क संकलन गर्दा कोही पनि नछुटिने गरी सावधानी र चनाखोपन अपनाउनुपर्नेमा जोड दिए।
त्यसैगरी प्रमुख अतिथि पूर्व संविधानसभा सदस्य खड्काले प्रभावितहरूले उठाएका मागहरूसँग आफ्नो समर्थन रहेको बताउँदै पुनर्बास अन्तर्राष्ट्रिय मापदण्डअनुसार हुनुपर्नेमा जोड दिए। उनलेे प्रभावितसँग हुने छलफलमा सरकारी निकायका प्रतिनिधि र कम्पनीका जिम्मेवार अधिकारी उपस्थित हुनुपर्ने बताउँदै, “यदि प्रभावितका मागहरू बेवास्ता गरियो वा दमनको प्रयास गरियो भने जनस्तरबाट विद्रोह हुन सक्ने धारण राखे ।
कार्यक्रमको अन्त्यमा अध्यक्ष भण्डारीले सबै वर्ग, जाति र समुदायको प्रतिनिधित्व हुने गरी छलफल र निर्णय अघि बढाइने बताए ।
चार दशकदेखि अलपत्र रहेको पश्चिम सेती जलविद्युत् आयोजना हाल भारतीय कम्पनी एनएचपीसी इन्डिया लिमिटेडमार्फत ८०० मेगावाट क्षमतामा अघि बढ्न थालेको छ।
