विपिन जोशीको मृत्यु भएको पुष्टि, शव हमासबाट इजरायललाई हस्तान्तरण

प्यालेस्टिनी लडाकु समूह हमासले नेपाली विद्यार्थी विपिन जोशीको मृत्यु भएको पुष्टि गर्दै उनको शव सोमबार इजरायललाई हस्तान्तरण गरेको छ।
बिबिसीले हमासलाई उद्धृत गर्दै सार्वजनिक गरेको समाचारअनुसार, सोमबार हमासले इजरायललाई हस्तान्तरण गरेका चार शवमध्ये एक विपिन जोशीको पनि रहेको छ। अन्य शवहरूमा गाइ इलौज, यासी सारबी र डानिल पिरेजको नाम समावेश छ।
सोही दिन हमासले २० जना जीवित इजरायली बन्धकहरूलाई अन्तर्राष्ट्रिय रेडक्रसमार्फत इजरायल सरकारलाई जिम्मा लगाएको थियो। त्यसपछि बाँकी २८ जनाको शव हस्तान्तरण गरिने जनाएको थियो।
विपिन जोशी २०२३ अक्टोबर ७ मा हमासले इजरायलको दक्षिण क्षेत्रमा आक्रमण गर्दा बन्दी बनाइएका थिए। उनले त्यसअघि करिब एक महिना अघि मात्रै सिक एन्ड अर्न कार्यक्रम अन्तर्गत कृषि अध्ययनका लागि इजरायल पुगेका थिए।
त्यो घटनामा १० जना नेपाली विद्यार्थीले ज्यान गुमाएका थिए भने छ जना घाइते भएका थिए।
सो आक्रमणको समयमा विपिनले आफ्ना घाइते साथीलाई जोगाउने प्रयास गर्दा हमासले उनलाई अपहरण गरेको दृश्य भिडियो फुटेजमा कैद भएको थियो।
इजरायलका लागि नेपाली राजदूत धनप्रसाद पण्डितका अनुसार, इजरायली सुरक्षा निकायले विपिन जीवित रहेको कुनै प्रमाण नभएको जानकारी उनी र विपिनका परिवारलाई दिइसकेको थियो।
विपिन जोशी ८८२०५७ सालमा बैतडीको पुर्चौडी नगरपालिका–१० (तत्कालीन विजयपुर गाविस)८८मा जन्मिएका थिए। उनी बुबा महानन्द जोशी र आमा पद्मा जोशीका एकमात्र छोरा हुन्।
दुई वर्षदेखि चलिरहेको इजरायल–हमास युद्ध रोकिएपछि, हमासले हालसम्म ४८ जना बन्धकमध्ये २० जना जीवितलाई रिहा गरेको छ। ती सबैलाई इजरायली सरकारले उपचार र आवश्यक सहयोगको व्यवस्था गरेको अन्तर्राष्ट्रिय सञ्चारमाध्यमहरूले जनाएका छन्।
यो युद्धविराम प्रक्रियामा अमेरिकी राष्ट्रपति डोनाल्ड ट्रम्पले विशेष भूमिका निर्वाह गरेका बताइएको छ। उनले इजरायल पुगेपछि बन्धकका परिवारसँग भेटवार्ता पनि गरेका थिए।