बाजुराबाट यस वर्ष करिब ५ सय कुईन्टल स्याउ निर्यात गरिएको छ । किसानहरूले उत्पादन गरेको स्याउ जिल्लाबाहिरका बजारतर्फ निर्यात गरिएको हो ।
नेपालगञ्ज, धनगढी र सुर्खेतका बजारमा करिब ७५ लाख रुपैयाँ बराबरको स्याउ बिक्री भएको अनुमान गरिएको छ।
जिल्लाको करिब ५०४ हेक्टर क्षेत्रफलमा स्याउका बगैँचा फैलिएका छन्, जसमध्ये २०८ हेक्टरमा उत्पादन भइरहेको छ। स्वामीकार्तिक, जगन्नाथ र बुढीनन्दा जस्ता उच्च पहाडी क्षेत्रमा स्याउ खेती फस्टाएको छ। करिब २ सयभन्दा बढी किसान व्यावसायिक रूपमा स्याउ खेतीमा संलग्न छन्।
तर, मनसुनको समयमा सडक अवरुद्ध हुने र ढुवानीमा समस्या आउने भएकाले धेरै स्याउ बारीमै कुहिने वा गाईवस्तुलाई खुवाउनुपर्ने अवस्था आउने गरेको किसानहरूको गुनासो छ।
कृषि ज्ञान केन्द्र, बाजुराका प्रमुख जसिराम साहनीका अनुसार बजार अभाव, ढुवानी कठिनाइ र गुणस्तर विभाजनको ज्ञान नहुँदा किसानले अपेक्षित आम्दानी पाउन नसकेका छन्। केन्द्रले प्याकेजिङ र ढुवानीमा ५० प्रतिशत अनुदान उपलब्ध गराए पनि सडक अभावका कारण प्रभावकारी हुन नसकेको उनले बताए।
साहनीका अनुसार, स्याउलाई ग्रेडिङ गरेर बिक्री गर्न सके किसानको आम्दानी दोब्बर हुन सक्छ। गुणस्तर अनुसार छुट्याएर बेच्ने र कमजोर स्याउबाट जुस, जाम, वा वाइनजस्ता प्रशोधित उत्पादन बनाउन सके स्याउ खेतीले बाजुराको आर्थिक समृद्धिमा ठूलो योगदान दिन सक्ने बताइएको छ।
Advertisement
