गाजा क्षेत्रमा हमासको नियन्त्रणमा रहेका नेपाली नागरिक विपिन जोशी जीवित रहेको नयाँ सूची सार्वजनिक भएको छ। यसअघि उनको अवस्थाबारे कुनै जानकारी नहुँदा अज्ञात रहेको समाचार सीएनएनले प्रकाशित गरेको थियो। तर हाल टाइम्स अफ इजरायल, एसोसिएटेड प्रेस (एपी) लगायत अन्तर्राष्ट्रिय सञ्चारमाध्यमले जारी गरेको २२ जना जीवित बन्धकको सूचीमा विपिनको नामसमेत समावेश गरिएको छ।
उक्त सूचीमा मृतक २६ बन्धक मध्ये सन् २०१४ मा मारिएका एक इजरायली सैनिकको शव पनि समावेश गरिएको बताइएको छ।
शुक्रबारदेखि सुरु भएको युद्धविरामले अक्टोबर ७, २०२३ मा सुरु भएको दुई वर्ष लामो विनाशकारी युद्ध अन्त्य हुने आशा जगाएको छ। उक्त आक्रमणमा करिब १,२०० जना मारिएका थिए भने २५१ जनालाई अपहरण गरिएको थियो।
गाजाको स्वास्थ्य मन्त्रालयका अनुसार युद्धका क्रममा हालसम्म ६७ हजारभन्दा बढी प्यालेस्टिनीको मृत्यु भएको छ। तीमध्ये झन्डै आधा महिला र बालबालिका रहेका छन्। साथै, गाजाको करिब २० लाख जनसंख्यामध्ये ९० प्रतिशतभन्दा बढी मानिस विस्थापित भएका छन्।
