बझाङ- छबिसपाथिभेरा गाउँपालिका–७ मा आयोजित क्रिकेट प्रतियोगिता सम्पन्न भएको छ । हिन्दुहरूको महान पर्व विजया दशमी २०८२ को अवसरमा जनशक्ति युवा क्लब खोरीले आयोजना गरेको खुल्ला पुरुष क्रिकेट प्रतियोगिता शुक्रबार सम्पन्न भएको हो । खेल र खेलाडीको विकास गर्न आयोजित प्रतियोगिताको उपाधि आयोजक जनशक्ति युवा क्लबले हात पारेको छ । दानछडा खेलमैदानमा भएको फाइनल खेलमा हिमाल स्मृति लेकगाउँले हराउँदै उपाधि हात पारेको हो।
पहिले ब्याटिङ गरेको हिमाल स्मृतिले १० ओभरमा जम्मा ७५ रन बनाएको थियो। त्यसपछि आयोजक जनशक्ति युवा क्लबका खेलाडीहरूले सहज प्रदर्शन गर्दै १० बल बाँकी छँदै लक्ष्य पछ्याउँदै विजयी बनेका स्थानीय तिलक बोहराले कामना टुडेलाई जानकारी दिए ।
उपाधि बिजेता आयोजकले नगद ४५ हजार पुरस्कार प्राप्त गरेको छ । त्यस्तै उपविजेता हिमाल स्मृतिले नगद १५ हजार पुरस्कार पाएको छ ।
असोज ११ गतेदेखि सुरु भएको प्रतियोगितामा २६ वटा टिमको सहभागिता रहेको थियोे ।
क्रिकेट पछिल्लो समय निकै लोकप्रिय खेल बन्दैछ , कुनै विशेष चाड पर्व आउन हुन्न, क्रिकेट प्रतियोगिताको वर्षा नै हुन्छ । यी प्रतियोगिता कुनै उपयुक्त खेलमैदान हुँदैनन् , कतै खेतबारीमा त कतै विद्यालयको फिल्डमा हुन्छन् ।
यहीँ बझाङी माटोमा खेलेर राष्ट्रिय तथा अन्तर्राष्ट्रिय स्तरमा खेलाडी पुगेका छन् । तर विडम्बना बझाङका कुनै ठाउँमा उपयुक्त खेल मैदान छैन । यहीँ खेल मैदान अभावका कारण दर्जनौं खेलाडीको प्रतिभा लुकेर बसेको छ । यसमा सरोकारवालाको कहिले ध्यानाकर्षण होला, कुनै अत्तोपत्तो छैन ।
