बझाङ : केदारस्यु गाउँपालिकाको वडा नं. ९, झोतामा मिति २०८२ भदौ १६ र १७ गते दुई दिने वित्तीय साक्षरता तथा बचत सम्बन्धी तालिम सम्पन्न भएको छ। वर्ल्ड भिजन इन्टरनेशनल नेपाल, दलित सहयोग समाज र केदारस्यु गाउँपालिकाको समन्वयमा सञ्चालित पोषण तथा उत्थानशील जीविकोपार्जन परियोजनाअन्तर्गत तालिम आयोजना गरिएको हो।
कार्यक्रममा ३५ वटा बचत समूहका प्रतिनिधित्व गर्ने ३५ जना सदस्य सहभागी भएका थिए। तालिममा सहकारी र बचत समूहको महत्व, बचत गर्ने तरिका, अभिलेख व्यवस्थापन, डेबिट–क्रेडिट प्रणाली, ऋण व्यवस्थापन तथा व्यवहारिक हिसाबकिताब सम्बन्धी सीप सिकाइिएको थियो।
कार्यक्रममा सहभागीको तर्फ बाट बोल्दै राम बिष्टले यो तालिमले हाम्रो समूह लगाएत अन्य समूहले धेरै कुरा सिक्ने अवसर पएको बताउदै संस्था लाई धन्यवाद पनि दिनु भएको थियो।
तालिममा परियोजना संयोजक रमेश बहादुर माली, प्रशासन तथा लेखा अधिकृत बिजय राज जोशी र फिल्ड अफिसर किरण थापाले प्रशिक्षण दिएका थिए। त्यस्तै, सहजकर्ता सत्य राज कोईराला, सुरेश नेपाली र कल्पना नेपालले सहजीकरण गरेका थिए।
समापन गर्दै परियोजना संयोजक मालीले सहभागीहरूले व्यक्तिगत र पारिवारिक खर्च व्यवस्थापन, आम्दानी खर्चमा सन्तुलन, नियमित बचतको बानी, वित्तीय संस्थामा पहुँच विस्तार, ऋण र बचतको सही प्रयोग, लगानी, बीमा तथा आकस्मिक कोषबारे व्यावहारिक ज्ञान प्राप्त गरेको बताए।
प्रशासन तथा लेखा अधिकृत बिजय राज जोशीले तालिमलाई व्यवहारमा लागू गर्न सके सहभागी समूहमा सकारात्मक परिवर्तन आउने र आगामी दिनमा बचतमा वृद्धि हुने अपेक्षा गरिएको उल्लेख गरे।
फिल्ड अफिसर किरण थापाले वित्तीय सचेतना र बचतको अभ्यासले समुदायमा आर्थिक सुरक्षाको आधार बलियो हुने विश्वास व्यक्त गर्नु भएको थियो। कार्यक्रम सत्य राज कोईरालाले संचालन गर्नु भएको थियो।
