बाजुरा– जिल्लाको त्रिवेणी नगरपालिका–५ स्थित रामेश्वरी माध्यमिक विद्यालयमा विगत छ वर्षदेखि खानेपानीको चरम अभाव कायम छ। समस्या समाधानका लागि पटक–पटक माग गरिए पनि अहिलेसम्म कुनै पहल भएको छैन।
खानेपानी नहुँदा विद्यालयका २८० विद्यार्थी घरबाटै बोतलमा पानी ल्याएर पिउन बाध्य छन्। शौचालयमा पानी नहुँदा दुर्गन्धित बनेको र प्रयोग गर्नै नसकिने अवस्था रहेको कक्षा १० का विद्यार्थी सुशील बुढाले बताए। “धारा छ तर पानी आउँदैन, शौचालय छ तर सफा छैन,” उनले भने।
विद्यालयका प्रध्यानाध्यापक टेकराज जोशीका अनुसार खानेपानी अभावकै कारण विद्यार्थीलाई पढाइमा समेत असर परेको छ। टाढा घर भएका विद्यार्थीहरूलाई अझ बढी समस्या हुने गरेको उनले बताए। विद्यालय व्यवस्थापन समितिले नगरपालिकासमक्ष बारम्बार मागपत्र बुझाए पनि सुनुवाइ नभएको उनको भनाइ छ।
वडा अध्यक्ष डिल्ली बुढाले समेत रामेश्वरी मावि खानेपानी संकटबाट गुज्रिएको स्वीकार गर्दै नगरपालिकाले अन्य वडाका विद्यालयमा बालमैत्री धारा र शौचालय निर्माण गरे पनि रामेश्वरी मावि भने अझै बेवास्तामा परेको बताए।
यता त्रिवेणी नगरपालिकाले भने ‘एक घर एक धारा’ अभियानमार्फत चाँडै सबै बस्ती र विद्यालयमा खानेपानी सुविधा पुर्याइने दाबी गरेको छ।
