अफ्रिकी देश घानामा बुधबार भएको हेलिकप्टर दुर्घटनामा रक्षामन्त्री एडवर्ड ओमाने बोमाह, वातावरणमन्त्री इब्राहिम मुर्तला मोहम्मदसहित आठ जनाको ज्यान गएको छ। दुर्घटनालाई घाना सरकारले राष्ट्रिय त्रासदी को संज्ञा दिएको छ।
ज्यान गुमाउनेमा कार्यवाहक उप-राष्ट्रिय सुरक्षा संयोजक अल्हाजी मोहम्मद मुनिरु लिमुना, सत्तारूढ राष्ट्रिय प्रजातान्त्रिक कांग्रेस (एनडीसी) पार्टीका उपाध्यक्ष शमूएल सारपोङ, पूर्व संसदीय उम्मेदवार शमूएल अबोआगेसमेत रहेका छन्।
हेलिकप्टरमा पाँच यात्रु र तीन चालक दलका सदस्यहरू थिए। घानाको सेनाका अनुसार दुर्घटनाग्रस्त जेड-९ उपयोगिता हेलिकप्टरले बिहान ९:१२ बजे राजधानी आक्राबाट उडान भरेको थियो। सो हेलिकप्टर सुन खानी रहेको ओबुआसी शहरतर्फ गइरहेको थियो, जहाँ एक राष्ट्रिय कार्यक्रम आयोजना हुने तय भएको थियो।
तर उडानपछि केही समयमै हेलिकप्टरसँग सम्पर्क विच्छेद भएको थियो। सेनाले जनाएको अनुसार उडानपछि हेलिकप्टर राडारबाट हराएको हो। हालसम्म दुर्घटनाको कारण खुल्न सकेको छैन।
राष्ट्रपति जोन महामाका प्रमुख कर्मचारी जुलियस डेब्राले पत्रकार सम्मेलनमार्फत राष्ट्रपतिद्वारा मृतक परिवारप्रति समवेदना व्यक्त गरिएको जानकारी दिए। उनले भने, “राष्ट्रपति र सरकार यस दुखद घटनामा ज्यान गुमाउने हाम्रा सहकर्मीप्रति गहिरो समवेदना प्रकट गर्दछ। अर्को सूचना नभएसम्म देशभर राष्ट्रिय झण्डा आधा झुकाइनेछ।”
घाना सरकारले दुर्घटनाबारे विस्तृत अनुसन्धान सुरु गरेको छ भने पीडित परिवारप्रति गहिरो दुःख व्यक्त गरेको छ।
