महेन्द्रनगर- रानाथारु समुदायको प्रमुख पर्व तीजको अवसरमा कञ्चनपुरका पाँच स्थानीय तहले आइतबार (साउन ११ गते) सार्वजनिक बिदा दिने भएका छन्। बिदा दिने पालिकाहरूमा कृष्णपुर, पुनर्वास, बेलौरी नगरपालिका तथा लालझाडी र बेलडाँडी गाउँपालिका रहेका छन्।
बेलौरी नगरपालिकाका कार्यवाहक प्रमुख जोगराम चौधरीका अनुसार पालिकाले हरेक समुदायका पर्वलाई सम्मान गर्दै रानाथारु समुदायको सांस्कृतिक महत्वलाई ध्यानमा राखी बिदा दिने निर्णय गरेको हो। उनले धार्मिक तथा सांस्कृतिक चाडपर्वले सामाजिक एकता बलियो बनाउने भन्दै खर्चिलो बनाउनेभन्दा पनि आर्थिक मितव्ययिता अपनाउन आग्रह गर
लालझाडी गाउँपालिकाले भने रानाथारु महिलाको तीज पर्व र थारु समुदायको गुरही पर्वको अवसरमा साउन ११ र १३ गते दुई दिन सार्वजनिक बिदा दिएको जनाएको छ। गाउँपालिका अध्यक्ष निर्मल रानाका अनुसार यी पर्व समुदायको मौलिक सांस्कृतिक पहिचानसँग जोडिएका छन्।
रानाथारु समुदायले तीज श्रावण शुक्ल तृतीयाका दिन मनाउने परम्परा छ। समुदायका अगुवा प्रेमवती रानाका अनुसार अन्य समुदायमा श्रीमान्को दीर्घायुको कामनाका लागि व्रत बस्ने चलन भए पनि रानाथारु महिलाहरू दाजुभाइको दीर्घायुका लागि व्रत बस्ने गर्दछन्।
“दिदीबहिनीहरू माइतीघरमा गई परम्परागत भेषभूषामा सजिएर पिङ खेल्दै माङ्गलिक गीत गाउने गर्छन्”, उनले भनिन्, “यस पर्वलाई हामी ‘सावनको डोला’ भनी चिन्छौँ।”
स्थानीय चेतराम रानाका अनुसार तीज आउनु लगभग १५ दिन अघिदेखि नै दिदीबहिनीहरूलाई निम्ता दिने चलन रहिआएको छ। खेतीपाती सकिएपछि थकान मेट्ने, मनोरञ्जन गर्ने र पारिवारिक बन्धनलाई बलियो बनाउने पर्वका रूपमा तीज मनाइन्छ।
