बझाङ— केदारस्यूँ गाउँपालिकामा बाल क्लब सञ्जालको संस्थागत विकास तथा नेतृत्व विकासका लागि तीनदिने तालिम सुरु गरिएको छ। गाउँपालिका भित्रका ९ वटै वडामा क्रियाशील बाल क्लबका पदाधिकारीलाई क्लबको संस्थागत सुदृढीकरण र नेतृत्व क्षमता अभिवृद्धि गर्ने उद्देश्यले तालिम सञ्चालन गरिएको हो।
तालिमको आयोजना प्रगतिशील युवा समाज र वर्ल्ड भिजन इन्टरनेशनल नेपालद्वारा सञ्चालित बाल संरक्षण परियोजनाको साझेदारीमा, केदारस्यूँ गाउँपालिकाको सहकार्यमा गरिएको हो।
तालिम उद्घाटन सत्रमा परियोजनाका फिल्ड संरक्षण अधिकृत विनोद थापाले कार्यक्रमको उद्देश्य स्पष्ट पार्दै, बाल क्लब सञ्जालसँग विगत पाँच वर्षदेखि विभिन्न क्षमता विकासमुखी कार्यक्रम सञ्चालन गर्दै आएको जानकारी दिए।
गाउँपालिकाका निमित्त प्रमुख प्रशासकीय अधिकृत केशवराज भट्टले बालबालिकाले आत्मविश्वासका साथ सार्वजनिक रूपमा प्रस्तुत हुन नसकेको देखिएको उल्लेख गर्दै, तालिमले उनीहरूको आत्मविश्वास अभिवृद्धिमा सहयोग पुर्याउने अपेक्षा व्यक्त गरे। साथै, सिकाइका कुरा व्यवहारमा उतार्न उनले सहभागीहरूलाई आग्रह गरे।
गाउँपालिका अध्यक्ष गणेशबहादुर बोहराले सहभागी बालबालिका निकै भाग्यमानी रहेको भन्दै, सबैलाई यस्ता अवसर सहजै प्राप्त नहुने बताए। उनले बाल्यकाललाई भविष्य निर्माणको आधारभूत समयका रूपमा चिनाउँदै, परिश्रम र संघर्ष विना उज्ज्वल भविष्य सम्भव नरहेको उल्लेख गरे।
“मान्छेले सबै कुरा जन्मजात सिकेर आउँदैन। सिक्न प्रयास गर्नु पर्छ, अहिलेको संघर्षले नै भविष्य उज्यालो बनाउँछ,” अध्यक्ष बोहराले भने। उनले सहभागी बालबालिकालाई तालिममा सक्रियतापूर्वक सहभागी हुन र ध्यानपूर्वक सिक्न सुझाव दिए।
आजदेखि गाउँपालिकाको सभाहल देउरामा सुरु भएको २४ जना सहभागी उक्त तालिम ३ गतेसम्म सञ्चालन हुनेछ । कार्यक्रमको सहजीकरण बिरेन्द्र बहादुर खड्काले गरिरहनुभएको छ ।
