आगलागीबाट पूर्ण रूपमा नष्ट भएको हुनैनाथ गार्मेन्ट उद्योगको केदारस्यूँ गाउँपालिकाको टोलीद्वारा स्थलगत निरीक्षण

बझाङ- केदारस्यूँ गाउँपालिका–४ बागथला बुङ्गल रोड डडियामा रहेको हुनैनाथ गार्मेन्ट उद्योगमा गएराति भीषण आगलागी हुँदा उद्योग पूर्ण रूपमा नष्ट भयो । आगलागी राति १२:४५ बजे सुरु भएको थियो। आगलागीबाट करिब १ करोड ५० लाख रुपैयाँ बराबरको क्षति भएको अनुमान गरिएको छ।
घटनाको खबर प्राप्त हुनासाथ गाउँपालिका अध्यक्ष गणेशबहादुर बोहराको नेतृत्वमा रहेको टोलीले आज बिहानै स्थलगत निरीक्षण गरेको छ। निरीक्षण टोलीमा उपाध्यक्ष मनिषा धामी, निमित्त प्रमुख प्रशासकीय अधिकृत केशवराज भट्ट, प्रशासकीय अधिकृत धनराज जोशी,शिक्षा शाखाका हिम्मत भण्डारी लगायत सहभागी थिए।
जिल्लामै नमुना उद्योगका रूपमा विकास भइरहेको हुनैनाथ गार्मेन्ट उद्योगमा ९ जना स्थायी कामदार कार्यरत थिए, जसमा ४ जना कर्मचारी र बाँकी ५ जना उद्योग सञ्चालकका परिवार सदस्य रहेका छन्। २०७२ सालदेखि सञ्चालनमा आएको उद्योगले सबै खाले आवश्यक पोशाक उत्पादन गर्दै आएको थियो। आगलागीबाट सम्पूर्ण संरचना र उत्पादन सामग्री जलेर नष्ट भएको उद्योग सञ्चालक पुष्पराज भट्टले बताएका छन्।
निरीक्षणका क्रममा पालिका अध्यक्ष बोहराले आगलागीपीडितलाई राहत उपलब्ध गराउने विषयमा पालिकाको कार्यपालिका बैंठक राखी निर्णय गरिनेछ। साथै, जिल्लाको नमुना उद्योग भएकाले राहत र पुनर्निर्माणका लागि पालिकाले अन्य सरोकारवाला निकायसँग समेत सहकार्यको अपिल गरेको छ।
गाउँपालिकाले यस्ता विपद्‌का बेलामा सबै सरोकारवालालाई सहकार्यका लागि आग्रह गरेको छ। अध्यक्ष बोहराले भने, “गाह्रोमा साथ दिने संस्कारलाई बलियो बनाऔं, मलमको खाँचो भएको आलो गाउँमा सबैले सहयोग पुर्‍याउनु हाम्रो जिम्मेवारी हो।