बैतडी- बझाङबाट धनगढी जाँदै गरेको जीप बैतडीमा दुर्घटना हुँदा चार जना यात्रु घाइते भएका छन्।
से १ ज १००५ नम्बरको बेलोरो जीप पाटन नगरपालिका–८ अनारखोलीमा बिहीबार अपराह्न ४ बजे सडकबाट करिब ३० मिटर तल खस्दा दुर्घटना भएको जिल्ला प्रहरी कार्यालय बैतडीले जनाएको छ।
घाइते हुनेमा बझाङको दुर्गाथली गाउँपालिका–६ का ३३ वर्षीय लोकेन्द्र महत, १३ वर्षीय औजित महत, ३० वर्षीया सरस्वती धामी र ४५ वर्षीय ओमजंग कडायत रहेका छन्। उनीहरूको उद्धार गरी डडेल्धुरा अस्पतालमा उपचार भइरहेको प्रहरीले जनाएको छ। सबै घाइतेको अवस्था सामान्य रहेको छ।
प्रहरीका अनुसार जीपमा चालकसहित पाँच जना सवार थिए। दुर्घटनामा परेको जीप आफैं अनियन्त्रित भएर सडकबाट खसेको प्रारम्भिक अनुसन्धानबाट खुलेको छ।
घटनापछि चालक बझाङको दुर्गाथली–४ का रमेश जाग्रीलाई नियन्त्रणमा लिइएको छ भने थप अनुसन्धान भइरहेको प्रहरीले जनाएको छ।
