दार्चुला— दार्चुलाको टिंकरस्थित छायालेक प्रहरी चौकीमा कार्यरत १३ जना प्रहरी जीर्ण गाह्रो र चुहिने छानामुनि सीमाको सुरक्षा गर्न बाध्य छन्। समुद्री सतहदेखि ३,४०० मिटर उचाइमा रहेको र चीनको सीमा नजिकै पर्ने उक्त चौकीमा भवनको अवस्था अत्यन्तै जर्जर छ।
दार्चुला जिल्ला प्रहरी कार्यालयका प्रमुख डिएसपी प्रकाश दाहालका अनुसार चौकी भवन निर्माणका लागि हालसम्म कुनै पनि निकायबाट बजेट प्राप्त भएको छैन। “सुदूरपश्चिम प्रदेश सरकारले थोरै मर्मतसम्भारको बजेट दिने अनौपचारिक जानकारी आएको छ,” उनले भने, “तर अन्य निकायबाट कुनै सहयोग आएको छैन।”
छायालेक चौकीमा असई मानबहादुर रोकायाको नेतृत्वमा १३ जना प्रहरी खटिएका छन्। कठ्यांग्रिँदो चिसोमा उनीहरू आगो ताप्दै रात बिताउन बाध्य छन्। तर, दाउराको समेत अभाव छ।
यो समस्या केवल छायालेकमा सीमित छैन। नेपालभर २,६६० प्रहरी कार्यालयमध्ये १,८६९ को मात्रै आफ्नै भवन छन् भने ३७० कार्यालय भाडाका घरमा र ४२१ अन्य सरकारी निकायको भवनमा सञ्चालन भइरहेका छन्।
प्रहरी संगठनका अनुसार ८०२ कार्यालयमा शौचालय छैन भने ८४३ मा ब्यारेक र ८३३ मा मेससमेत छैन। भौतिक संरचनाको अभावले प्रहरीको दैनिक कामकाज प्रभावित भइरहेको छ।
यस्तै, गुणस्तरीय पोसाकसमेत अभाव रहेको भन्दै प्रहरी प्रधान कार्यालयले गृह मन्त्रालयलाई पटक–पटक बजेट माग गर्दै आएको छ। तर गृह मन्त्रालयको चासो न्यून भएको प्रहरी संगठनको गुनासो छ। हेडक्वाटरबाट वितरण गरिने पोसाक केही महिनामै फाटिने भएकाले अधिकांश प्रहरी आफ्नै तलबबाट नयाँ पोसाक किन्न बाध्य छन्।
Advertisement
