उत्तमकुमार थापा बझाङ, सुदूरपश्चिम — सुदूरपश्चिम प्रदेश अन्तर्गत बझाङ जिल्लाको विकट भनेर चिनिँदै आएको तलकोट गाउँपालिका पछिल्लो समय विकास र समृद्धिको यात्रामा तीव्र गतिमा अगाडि बढिरहेको देखिएको छ।
“सुखी नेपाली, समृद्ध नेपाल” भन्ने राष्ट्रिय अभियानसँग तालमेल मिलाउँदै स्थानीय सरकारको सक्रियता र स्थानीय नेतृत्वको पहल मार्फत गाउँपालिका भौतिक पूर्वाधारदेखि सामाजिक क्षेत्रमा समेत प्रगतिको मार्गमा अघि बढिरहेको छ।
प्रशासकीय अधिकृतको सकारात्मक अनुभव
प्रमुख प्रशासकीय अधिकृत यादव भट्टराईका अनुसार, संघीय संरचनाले विकट मानिएको बझाङको सम्भावना र समृद्धिको ढोका खोलिदिएको छ। “पहिलो पटक आउँदा अप्ठ्यारो लागे पनि केही दिनमै तलकोटको शान्त वातावरण, सलल बग्ने सेती नदी र हिमालको दृश्यले मन छुन्छ”, उनले बताए। उनले आफू नागरिक सेवामा दिनरात खटिएको र कर्मचारी टोलीको साथ पाउँदा थप हौसला मिलेको उल्लेख गरे।
महिला सशक्तीकरणमा उपाध्यक्षको अग्रसरता
गाउँपालिका उपाध्यक्ष पार्वती कुवर भण्डारीले पछिल्लो समय महिला सशक्तीकरण र जलवायु परिवर्तनको विषयमा गाउँपालिकाले सक्रियता देखाएको बताइन्। “पछाडि परेका दिदीबहिनीलाई सिप विकास तालिममार्फत सक्षम बनाउने प्रयास भएको छ”, उनले भनिन्।
भौतिक पूर्वाधार निर्माणमा उल्लेखनीय प्रगति
गाउँपालिका अध्यक्ष कलक रोकायाले स्थानीय तहको निर्वाचन २०८९ पश्चात प्रशासकीय भवन निर्माण, सडक सञ्जाल विस्तार र मेलविसैना स्वास्थ्य चौकी निर्माणमा उल्लेखनीय प्रगति भएको बताए। “अब चाँडै तलकोटका नागरिकले सहज सेवा पाउनेछन्”, उनले जनाए।
पर्यटकीय स्थलको प्रवर्द्धन
तलकोटका पर्यटकीय सम्भावनालाई ध्यानमा राख्दै स्थानीय सरकारले तातोपानी तपोवन, दातोला झरना जस्ता स्थानलाई व्यवस्थित गर्दै पर्यटन प्रवर्द्धनमा विशेष ध्यान दिएको छ। प्रमुख प्रशासकीय अधिकृत यादव भट्टराईका अनुसार, “यी प्राकृतिक स्रोतहरूको व्यवस्थापनमार्फत पर्यटन र रोजगारीमा टेवा पुग्नेछ।”
समृद्ध र समुन्नत समाजको परिकल्पना साकार पार्ने यात्रामा तलकोट गाउँपालिका विकासका विविध आयामहरूमा मजबुत कसम साथ अघि बढिरहेको छ। नागरिक सहभागिता, सक्षम नेतृत्व र स्पष्ट योजना मार्फत तलकोट अब सुदूरपश्चिमका उदाहरणीय स्थानीय तहमध्ये उभिन सक्ने सम्भावना देखिएको छ।
