२४औं अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) महाधिवेशनले देशभर विद्यार्थी राजनीतिमा नयाँ ऊर्जा र बहसको माहोल सिर्जना गरिरहेको छ । यही महाधिवेशन अन्तर्गत सुदूरपश्चिम प्रदेशको भूगोलतर्फबाट बाजुराका होनहार युवा नेता पारस रावल केन्द्रिय सदस्य पदका लागि बलियो दावेदारका रूपमा अगाडि आएका छन् ।
सानै उमेरदेखि समाजसेवा र विद्यार्थी हकहितमा समर्पित रावलले शिक्षाको गुणस्तर सुधार, विद्यार्थी अधिकारको रक्षा, संगठन सुदृढीकरण र समावेशी नेतृत्व निर्माण जस्ता विषयमा स्पष्ट दृष्टिकोणसहित उम्मेदवारी दिएका छन् । निरन्तरको सक्रियता र जनसम्पर्कमा आधारित अभियानमार्फत उनले देशभरका प्रतिनिधिहरूमध्ये व्यापक समर्थन बटुल्न सफल भएका छन् ।
२८ गते हुने मतदानको मिति नजिकिँदै जाँदा महाधिवेशनको माहोल तातिंदो छ। उम्मेदवारहरू आ–आफ्ना एजेन्डा प्रस्तुत गर्न व्यस्त छन् भने प्रतिनिधिहरूले नयाँ पुस्ताको नेतृत्व चयन गर्ने तयारीमा चासोपूर्वक छलफल गरिरहेका छन् ।
पारस रावल सामाजिक चेतना, संगठनात्मक कार्यदक्षता, सहकार्यको भावना र नेतृत्व कौशलले सुसज्जित एक युवा नेताका रूपमा पहिचान बनाउँदै आएका छन् । बाजुराबाट केन्द्रमा सशक्त प्रतिनिधित्व गर्दै विद्यार्थी आन्दोलनलाई नयाँ दिशा दिन सक्ने सम्भावनायुक्त युवाको रुपमा उनलाई हेरिएको छ ।
