कैलाली: नेकपा एमालेको सबैभन्दा बलियो मानिने जनसंगठन, राष्ट्रिय युवा संघ नेपाल, आफ्नो दशौँ राष्ट्रिय महाधिवेशनको तयारीमा छ । जेठ ९ देखि ११ गतेसम्म पोखरामा आयोजना हुने यो महाधिवेशनले युवा संघको नयाँ नेतृत्व चयन गर्दैछ । देशभरिबाट १ हजार ९०० प्रतिनिधिहरूको उपस्थितिमा हुने महाधिवेशनमा महासचिव पदका लागि अहिले ७ जनाको दाबी देखिए तापनि विनय शाह सबैभन्दा सशक्त उम्मेदवारका रूपमा अगाडि आएका छन् ।
महासचिव पदका लागि वर्तमान उपमहासचिव राजन थापा, सचिव निरोज पौडेल, कुबेर अधिकारी, खेम शर्मा, महेश चौलागाईं र पर्वत भण्डारीले पनि आ-आफ्नो दाबी गरेका छन् । तर, उमेर हदबन्दी र संगठनभित्रको सन्तुलनका हिसाबले थापाको उम्मेदवारी असहज देखिँदै गएको छ । बाँकी दावेदारहरूमध्ये संगठनभित्रको स्वीकार्यता, दृष्टिकोण र कार्यशैलीका हिसाबले विनय शाह सबैभन्दा सशक्त उम्मेदवारको रूपमा स्थापित हुँदै गएका छन् ।
पार्टीले हाल ३३९ सदस्यीय रहेको युवा संघको केन्द्रीय कमिटीलाई घटाएर अब १५१ सदस्यीय बनाउने निर्णय गरेपछि नेतृत्व चयन प्रक्रिया अझ गम्भीर र प्रतिस्पर्धात्मक बन्न पुगेको छ । जम्मा ९ पदाधिकारी चयन गर्नुपर्ने भएकाले उम्मेदवारहरूको संख्या घटे पनि प्रतिस्पर्धा भने कडा छ। त्यसमाथि आयोग, विभाग, प्रदेश र अन्तरजिल्ला संरचना जस्ताको तस्तै रहने भएकाले केन्द्रीय नेतृत्वमा पुग्न योग्य र सक्षम युवा अनुहारहरूमाथि थप जिम्मेवारी आउनेछ ।
यही पृष्ठभूमिमा विनय शाहको उम्मेदवारी अर्थपूर्ण बन्दै गएको छ । उनले संगठनमा दशकभन्दा बढी समय समर्पण गरेका छन् । साधारण कार्यकर्ताबाट सुरु भएको उनको यात्रा अहिले सचिवसम्म आइपुगेको छ । सुदूरपश्चिम प्रदेशमा उनले गरेको संगठन विस्तार, युवालाई राजनीति र राष्ट्रनिर्माणमा जोड्न गरेका काम, र विचारलाई व्यवहारमा उतार्ने उनको शैलीले उनलाई महासचिव पदका लागि समय र संगठनले खोजेको नेतृत्वको रूपमा उभ्याएको छ ।
विनय शाहको राजनीतिक यात्रा र एजेण्डा :
विनय शाहले २०६० सालमा अनेरास्ववियुको सदस्यबाट राजनीति सुरु गरेका हुन् । पोखरा विश्वविद्यालयको अध्यक्ष हुँदै उनी अनेरास्ववियुको केन्द्रीय सदस्य, एसिया स्टुडेन्ट्स एसोसिएसन संयोजक, युवा संघको प्रदेश अध्यक्ष, विदेश विभाग प्रमुख हुँदै अहिले केन्द्रीय सचिवको जिम्मेवारीमा छन् । उनले जनताको बहुदलीय जनवादलाई प्रविधिमैत्री मोड्युलबाट विस्तार गर्ने र मार्क्सवादलाई प्रगतिशील विज्ञानका आधारमा परिभाषित गर्ने दृष्टिकोण राख्छन् ।
मुख्य एजेण्डाहरू
- संगठनात्मक रूपान्तरण
संगठनलाई नेता उत्पादन गर्ने फ्याक्ट्रीमा बदल्ने, रिपोर्टिङ/मूल्यांकनमा डिजिटल पारदर्शिता, युथ फोर्सको सशक्तिकरण, प्रशिक्षण सुधार र युवा परिषदलाई दोस्रो सर्वोच्च निकाय बनाउने ।
- अन्तर्राष्ट्रिय समन्वय र कूटनीति
Youth Peace Ambassadors, Cross-border Dialogue, International Volunteer Corps, Cultural Diplomacy, Digital Youth Diplomacy Platform लगायत कार्यक्रममार्फत अन्तर्राष्ट्रिय युवा सहभागिता विस्तार गर्ने ।
- प्रविधि, उद्यमशीलता र उत्पादन
फ्री कोडिङ क्याम्प, “प्रविधि मेरो साथी” अभियान, युवा उद्यम मेला, कानुनी परामर्श, सामूहिक खेती, स्थानीय उत्पादनमा ई–कमर्स जोड्ने योजना ।
- संस्कृतिक क्रान्ति र नीति
नेपाली भाषा, धर्म र परम्पराप्रति गर्व गर्ने सोच विकास, योग-संस्कृत शिक्षाको पुनः स्थापन, शिक्षा प्रणालीमा संस्कृति र इतिहास समेट्ने, स्थानीय तहमा सांस्कृतिक पुनर्जागरण, लोपोन्मुख परम्पराको संरक्षण र राष्ट्रिय संस्कृतिनीतिको निर्माण ।
संगठनभित्रको गुटगत प्रतिस्पर्धालाई सन्तुलनमा राखेर सहकार्यको बाटोबाट समाधान खोज्ने शाहको कार्यशैली पनि उनलाई महासचिव पदको बलियो उम्मेदवार बनाउने अर्को पक्ष हो । उनले नेतृत्व सम्हालेका प्रदेश, विभाग र विविध कार्यक्रमहरूमा देखाएको संयम, निर्णय क्षमता र कार्यदक्षता अहिले युवा संघको केन्द्रीय स्तरमा आवश्यक भएको विशेषता हो ।
महासचिव पदको नेतृत्व केवल हैसियतको विषय होइन, संगठनलाई दिगो बनाउने, नयाँ पुस्तालाई आकर्षित गर्ने र समकालीन चुनौतीसँग जुध्न सक्ने क्षमताको पनि विषय हो। यही सन्दर्भमा विनय शाह सबैभन्दा उपयुक्त छन् । संगठनलाई विस्तारमात्रै होइन, सुदृढ र सुसंगठित बनाउने उनको दृष्टिकोण अहिलेको आवश्यकता बनेको छ ।
उनीसँग गाउँदेखि सहर, कार्यकर्तादेखि नेतृत्व तहसम्मको विश्वासको सञ्जाल छ । सहजता, संवादमा पारदर्शिता, र कार्यशैलीमा स्पष्टता उनका विशेषता हुन् ।
पार्टीले केन्द्रीय नेतृत्वको संख्या घटाए पनि विभाग, आयोग, परिषद् र अन्तरजिल्ला संरचना यथावत राखेकाले नेतृत्वले बढि जिम्मेवारी र चुस्तता देखाउनुपर्नेछ । यस्तो समयमा संगठनभित्र अनुभव, नवीन दृष्टिकोण र कार्यक्षमता भएकैलाई जिम्मेवारी दिनुपर्ने आवाज बलियो बन्दै गएको छ । यो सन्दर्भमा विनय शाह स्वभाविक उम्मेदवारका रूपमा स्थापित हुनु आश्चर्यको कुरा होइन । अहिले महासचिव पदका लागि चर्चामा रहेका अन्य दावेदारहरूमध्ये शाह सबैभन्दा सक्रिय, सशक्त र सन्तुलित छवि भएका नेता हुन् । संगठनमा दीर्घकालीन योगदान, नवप्रवर्तनशील सोच, व्यवहारिक नेतृत्व शैली र युवा पुस्तासँगको आत्मीय सम्बन्धकै कारण उनी महासचिव पदको लागि सबभन्दा उपयुक्त विकल्प हुन् भन्ने धारणा व्यापक बन्दै गएको छ ।
