कैलाली: नेकपा माओवादी केन्द्रको भातृ संगठन वाईसीएल नेपाल, गौरीगङ्गा नगरपालिकाको अध्यक्षमा सुरेश धामी सर्वसम्मत चयन भएका छन्। आज सम्पन्न नगरस्तरीय अधिवेशनले धामीको नेतृत्वमा ५५ सदस्यीय नगर कमिटी गठन गरेको हो ।
कार्यक्रमको अध्यक्षता नवनिर्वाचित अध्यक्ष सुरेश धामीले गरेका थिए भने प्रमुख अतिथिका रूपमा नेकपा माओवादी केन्द्रका केन्द्रीय सदस्य कृष्णकुमार चौधरी ‘कुन्दन’को विशेष उपस्थिति रहेको थियो । कार्यक्रममा वाईसीएलको भूमिकाबारे विभिन्न तहका नेताहरूले धारणा राखेका थिए। कार्यक्रमको सञ्चालन नरेश भुलले गरेका थिए ।
गौरीगङ्गा नगरपालिका इन्चार्ज नवीन धामीले वाईसीएलले गणतन्त्रको रक्षा तथा भ्रष्टाचारविरुद्ध अग्रणी भूमिका खेल्नुपर्ने बताए । उनले स्थानीय सरकारका गतिविधिमा निगरानी राख्नुपर्ने र आगामी २०८४ मा वाईसीएललाई माओवादी सेनाको रुपमा खडा गर्ने योजनासमेत सार्वजनिक गरे ।
वाईसीएलका केन्द्रीय उपमहासचिव बिश्वले अबको युवा संगठनलाई अर्थतन्त्रसँग जोड्दै उत्पादनशील बनाउनुपर्ने धारणा राखे । उनले युवा देशको मेरुदण्ड भएको र त्यसलाई मजबुत बनाउनुपर्नेमा जोड दिए ।
नगर प्रमुख तथा पार्टीका प्रदेश सदस्य देवी कडेलले आफ्नो कार्यकालमा युवालाई आत्मनिर्भर बनाउँदै नगरपालिकाको सञ्चालनमा वाईसीएलसँग सहकार्य गरेर अगाडि बढ्ने प्रतिबद्धता जनाए । उनले वाईसीएललाई हरेक क्षेत्रमा सहयोग गर्ने प्रतिवद्धता पनि व्यक्त गरे ।
पार्टीका केन्द्रीय सदस्य लक्षीराम आचार्यले २०६४ सालको वाईसीएलको सक्रियतालाई सम्झाउँदै सोही शैलीमा अगाडि बढ्नुपर्ने धारणा राखे । प्रमुख अतिथि तथा संविधानसभा सदस्य कुन्दनले वाईसीएलले हरेक तहमा नेतृत्व निर्माणमा अग्रसर हुनुपर्ने र युवाहरुलाई रोजगारीसँग जोड्नुपर्ने बताए ।
वाईसीएल गौरीगङ्गा नगर कमिटीको नेतृत्व:
अध्यक्ष: सुरेश धामी
उपाध्यक्ष: अमित नेपाली, पार्वती चौधरी
सचिव: नरेश भुल
सह–सचिव: भीम भुल, दिपेश चौधरी
कोषाध्यक्ष: सुरज आउजी
५५ सदस्यीय नगर कमिटीले आगामी दिनमा युवा परिचालन, स्थानीय सरकारको अनुगमन तथा सामाजिक रूपान्तरणमा अग्रणी भूमिका खेल्ने लक्ष्य राखेको छ।
