बझाङ – थलारा गाउँपालिकामा कर्मचारी भएर काम गर्दै आएकी जुन ऐर कडायत आफैँ नियम मिच्ने गम्भीर आरोपमा मुछिएकी छन् । २६ वर्षदेखि सि. अनमी पदमा कार्यरत ऐर कडायतले “कुशल मेडिकल” नामक पसल खोली अबैध रुपमा औषधि बिक्री गर्दै आएकी थिइन् । न त फार्मेसी सम्बन्धी आवश्यक अध्ययन गरेको, न त कानुनी दर्ता प्रक्रिया पूरा गरिएको — यस्ता गम्भीर अनियमितताका बाबजुद उनले औषधि बिक्री वितरण गर्दै आएकी थिइन् ।
नियमन गर्ने जिम्मेवारी पाएका व्यक्तिले आफैँ नियमको खिल्ली उडाएको भन्दै स्थानिय स्तरमा चर्को विरोध सुरु भएको छ । शुक्रबार स्वास्थ्य कार्यालयका सहायक फर्मासिस्ट द्वारिका जोशी, सहायक प्रमुख जिल्ला अधिकारी सत्य कुमारी जोशी, जिल्ला प्रहरी कार्यालयका प्रतिनिधि र स्थानीय जनप्रतिनिधिको रोहबरमा “कुशल मेडिकल” पसल सिलबन्दी गरिएको छ । नेपालको औषधि सम्बन्धी ऐन, २०३५ अनुसार कुनै पनि व्यक्ति वा संस्थाले औषधि बिक्री वितरण गर्नुअघि फार्मेसी अध्ययन गरेको हुनुपर्छ र सम्बन्धित निकायबाट अनुमति प्राप्त गर्नुपर्छ । तर ऐर कडायतले यी सबै कानुनी प्रक्रियाको उल्लंघन गरेकी पुष्टि भएको छ ।
सहायक प्रमुख जिल्ला अधिकारी सत्य कुमारी जोशीका अनुसार जिल्लाभर अवैध रूपमा सञ्चालनमा रहेका दर्ता नभएका औषधि पसलहरुमा कारबाही अभियान तीव्र पारिएको छ। जोशी भन्छिन्, “स्वास्थ्यजस्तो संवेदनशील क्षेत्रमा यस्तो लापरवाही सह्य हुँदैन। जुनसुकै व्यक्ति वा हैसियतमा बसे पनि कानुन सबैका लागि बराबर हो ।”
थलारा गाउँपालिका र खोलि बजारका स्थानीय बासिन्दाहरुले कर्मचारीले नै यस्तो अनियमितता गर्नु लज्जास्पद भएको प्रतिक्रिया दिएका छन् । “हाम्रो स्वास्थ्यको संरक्षण गर्ने जिम्मा पाएका व्यक्तिहरुले नै जब स्वार्थका लागि जनताको ज्यानसँग खेलवाड गर्छन्, तब हामीलाई कसलाई विश्वास गर्ने?” एक स्थानिय बासिन्दाले आक्रोश पोखे ।
जनस्वास्थ्यको सवालमा कुनै पनि सम्झौता नगरिने स्पष्ट सन्देश अधिकारीहरुले दिएका छन् । कानुनमाथि आस्था गुम्न नदिन र दोषीलाई दण्डित गर्न यो घटना एउटा महत्वपूर्ण उदाहरण बन्नेछ कि भन्ने आशा गरिएको छ ।
