काठमाडौं- चर्चित टिकटकर तथा मोडल पवित्रा साकी (मिस पवि)ले १६ वर्षको उमेरमै डिभोर्स भएको खुलासा गरेकी छन्। हालै एक युट्युब अन्तर्वार्तामा उनले आफ्ना व्यक्तिगत संघर्ष, पीडा र जीवनबाट सिकेका पाठबारे खुलेर बोलेकी हुन्।
उनले कानुनी रूपमा विवाह नभए पनि वैवाहिक सम्बन्ध टुटेको बताइन्। “म उसलाई कहिल्यै नराम्रो भन्न चाहन्न,” उनले भनिन्, “जे भयो, सकियो। पछुतो छैन। त्यो अनुभवबाट जीवनका धेरै कुरा सिकेँ, अगाडि बढ्नुपर्छ भन्ने थाहा पाएँ।”
डिभोर्सको कुरामा मात्रै अल्झिरहनु ठीक होइन भन्ने धारणा राख्ने मिस पविले, विगतमा बसेर रोइरहने र दोषारोपण गरिरहनु व्यर्थ भएको बताउँछिन्। “त्यस समय म बच्चै थिएँ। अहिले २५ वर्षकी भइसकेकी छु, धेरै कुरा बुझ्न थालेकी छु,” उनले भनिन्।
उनी भन्छिन्, “कतिपटक सुसाइड गर्ने प्रयास पनि गरेँ। म आएको समाजमा त्यस्ता घटनालाई सहज रूपमा लिइँदैन। तर समयसँगै ती सबै कुराहरू कट्दै गए।”
मिस पविले आफ्नो जीवनमा धेरै सकारात्मक काम गरे पनि समाजले सधैं नराम्रो पक्ष मात्र कोट्याउने गुनासो गरेकी छन्।
“मैले धेरै राम्रो कुरा पनि गरेकी छु। तर मान्छेले सधैं नराम्रो कुरालाई मात्र देख्छन्,” उनले भनिन्, “त्यो घटना मेरो जीवनको ठूलो दशा थियो, जुन अब कटिसकेको छ।”
स्मृतिमा हराउँदै उनले भनिन्, “अहिले फर्केर हेर्दा, त्यो बेला सानो लाग्छ। स्कुलका साथीहरू पनि अब साथमा छैनन्,” भन्दै उनले भावुक हुँदै आँसु पनि बगाइन्।
हाल मिस पवि टेलिभिजन शो ‘कमेडी दरबार’ मा ब्यस्त छन्। उनले केही समयअघि मात्र फिल्म ‘माग्ने राजा’ को छायांकन पूरा गरेकी छन्, जुन चाँडै सार्वजनिक हुने तयारीमा छ।
