काठमाडौँ– भारतमा जारी इन्डियन प्रिमियर लिग (आईपीएल) क्रिकेटमा सनराइजर्स हैदरावादले पञ्जाब किङ्ग्सलाई ८ विकेटले पराजित गरेको छ।
गएराति सम्पन्न खेलमा पञ्जाबले दिएको विशाल २४६ रनको लक्ष्य हैदरावादले १८.३ ओभरमै मात्र दुई विकेट गुमाएर भेट्टायो। हैदरावादका अभिषेक शर्माले विस्फोटक १४१ रनको शतकीय पारी खेले भने ट्राभिस हेडले ६६ रन बनाए। पञ्जाबका अर्शदीप सिंह र युजवेन्द्र चहलले समान एक–एक विकेट लिए।
त्यसअघि टस जितेर पहिले ब्याटिङ गरेको पञ्जाबले ६ विकेट गुमाउँदै २४५ रन बनायो। श्रेयस अय्यरले ८२, प्रभसिमरन सिंहले ४२, प्रियान्श आर्यले ३६ र मार्कस स्टोइनिसले अविजित ३४ रन जोडे। हैदरावादका हर्षल पटेलले ४ विकेट र इशान मालिङ्गाले २ विकेट लिए।
यो जितसँगै हैदरावादले ६ खेलबाट ४ अंक जोड्दै अंकतालिकाको आठौं स्थानमा उक्लिएको छ। पञ्जाब भने ५ खेलबाट ६ अंकसहित छैटौं स्थानमा छ।
यसअघि हिजो भएको पहिलो खेलमा लखनउ सुपर जायन्ट्सले गुजरात टाइटन्सलाई ६ विकेटले पराजित गर्यो। १८१ रनको लक्ष्य लखनउले १९.३ ओभरमा ४ विकेट गुमाएर भेट्टायो। गुजरातले पहिला ब्याटिङ गर्दै ६ विकेट गुमाएर १८० रन बनाएको थियो।
छ–छ खेल खेलेका लखनउ र गुजरात दुवैले ८–८ अंक जोडेका छन्, तर रन रेटका आधारमा गुजरात दोस्रो र लखनउ तेस्रो स्थानमा छन्।
