काठमाडौं- भारतमा जारी इन्डियन प्रिमियर लिग (आईपीएल) मा कोलकाता नाइट राइडर्सले चेन्नई सुपर किङ्सलाई आठ विकेटले पराजित गरेको छ।
महेन्द्रसिंह धोनी कप्तानीमा फर्किएको दिनमै चेन्नईले हार बेहोरेको हो। नियमित कप्तान ऋतुराज गायकवाड कुहिनाको चोटका कारण प्रतियोगिताबाट बाहिरिएपछि धोनीले नेतृत्व सम्हालेका थिए।
चेन्नईले दिएको १०४ रनको लक्ष्य कोलकाताले १० ओभर एक बलमा दुई विकेट गुमाउँदै १०७ रन बनाउँदै सजिलै पार गर्यो। सुनील नारायणले ४४ रन बनाउँदै जितमा महत्वपूर्ण योगदान दिए भने क्विन्टन डि ककले २३ रन जोडे।
चेन्नईतर्फ नूर अहमद र अन्सुल कामबोजले समान एक–एक विकेट लिए। त्यसअघि, एमए चिदम्बरम स्टेडियम, चेपौकमा टस हारेर पहिले ब्याटिङ गरेको चेन्नईले ९ विकेट गुमाएर १०३ रन मात्र बनाउन सक्यो।
चेन्नईका शिवम दुबेले अविजित ३१ रन बनाए भने विजय शंकरले २९ रन जोडे। कोलकाताका सुनील नारायणले तीन विकेट, हर्षित राना र वरुण चक्रवर्तीले दुई–दुई विकेट, र वैभव अरोरा तथा मोइन अलीले एक–एक विकेट लिए।
यस जितसँगै कोलकाता तेस्रो स्थानमा उक्लिँदै ६ खेलबाट ६ अङ्क जोड्न सफल भएको छ। लगातार पाँच खेलमा पराजित भएको चेन्नई दुई अङ्कसहित नवौं स्थानमा छ।
आईपीएलमा आज लखनउ सुपर जायन्ट्सले गुजरात टाइटन्ससँग र सनराइजर्स हैदराबादले पन्जाब किङ्ससँग प्रतिस्पर्धा गर्नेछन्।
