बझाङ- बझाङको थलारा गाउँपालिकामा कृत्रिम बुद्धिमत्ता (एआइ) प्रविधियुक्त एक्स–रे मेसिन प्रयोग गरी क्षयरोग (टीबी) को सक्रिय खोजपड्ताल अभियान सञ्चालन गरिएको छ।
नेपाल सरकारको “क्षयरोग अन्त्य राष्ट्रिय रणनीति” अन्तर्गत थलारा गाउँपालिकामा कृत्रिम बुद्धिमत्ता (एआइ) प्रविधियुक्त एक्स–रे मेसिन प्रयोग गरी क्षयरोग (टीबी) को सक्रिय खोजपड्ताल अभियान सञ्चालन गरिएको हो ।
चैत्र २६ गते वडा नं. २ र ४ मा १ सय ४७ जनाको स्क्रिनिङ गर्दा १६ जनामा क्षयरोगको सम्भावना देखिएको र ती सबैको खकार परीक्षणका लागि नमुना संकलन गरिएको छ।
त्यस्तै, चैत्र २७ गते वडा नं. ३ र ८ मा गरिएको ३३९ जनाको स्क्रिनिङमा १० जनामा क्षयरोगको सम्भावना पाइएपछि उनीहरूलाई थप परीक्षणका लागि सिफारिस गरिएको छ।
अभियानका संयोजक दिलीप ओलीका अनुसार, खोजपड्ताल अभियान चैत्र २९ गतेसम्म पालिकाका अन्य वडाहरूमा पनि निरन्तर जारी रहनेछ।
यही अभियानको निरन्तरतास्वरूप चैत्र ३० गते जयपृथ्वी नगरपालिका–११ स्थित सिद्धमाना र चैत्र ३१ गते कैलाशमा पनि स्क्रिनिङ कार्यक्रम सञ्चालन गरिने स्वास्थ्य कार्यालयका ल्याब टेक्निसियन निरीक्षक नारायण जोशीले जानकारी दिए।
यसैबीच, जिल्लाको कारागारमा रहेका कैदीबन्दीहरूमा पनि क्षयरोग स्क्रिनिङ गर्ने तयारी गरिएको छ। सोका लागि स्वास्थ्य निर्देशनालय डोटीका क्षयरोग अधिकृत मनोज ओझाले प्रमुख जिल्ला अधिकारी, स्वास्थ्य कार्यालय र कारागार प्रशासनसँग समन्वय गरी मिति तय भइसकेको जानकारी दिए ।
स्वास्थ्य कार्यालय बझाङका प्रमुख लालबहादुर धामीका अनुसार, प्रीभ्यालेन्स सर्वेक्षण २०१९ का आधारमा जिल्लामा वार्षिक करिब ४ सय १६ जनामा क्षयरोग देखा पर्ने अनुमान गरिए पनि हालसम्म वार्षिक औसत १ सय ८० जनामात्र पहिचान हुने गरेको तथ्यांक छ।
“उपचारको पहुँचबाहिर रहेका बिरामीहरूको पहिचान गरी समयमै उपचारमा ल्याउन यो अभियानले महत्वपूर्ण भूमिका खेल्नेछ,” प्रमुख धामीले बताए । उनका अनुसार, जिल्लालाई क्षयरोगमुक्त बनाउने लक्ष्यसहित स्वास्थ्य कार्यालय बझाङ निरन्तर क्रियाशील रहेको छ।
Advertisement
