धनगढी – धनगढीमा रहेको कैलाली बहुमुखी क्याम्पसको स्वतन्त्र विद्यार्थी युनियन (स्ववियु) निर्वाचनमा सभापति पदकी उम्मेदवार अम्बिका चौधरीले आफूलाई अराजक समूहले पटक–पटक धम्की दिएको खुलासा गरेकी छन्। नेपाली कांग्रेस निकट नेपाल विद्यार्थी संघ (नेविसंघ) बाट बिद्रोह गर्दै स्वतन्त्र उम्मेदवारी दिएकी चौधरीले धम्कीका बाबजुद पनि आफ्नो उम्मेदवारी कायम रहेको स्पष्ट पारिन्।
“म अत्यन्त दुःखी छु, तर डराएकी छैन, हिम्मत हारेकी छैन,” चौधरीले सामाजिक सञ्जालमार्फत सार्वजनिक गरेको अपिलमा भनेकी छन्, “धम्की, लोभ र प्रलोभन सबै आयो, तर म अडिग छु।”
उनले निर्वाचनमा स्वतन्त्र, निष्पक्ष र विवेकयुक्त मतदानको आग्रह गर्दै भनिन्, “कसैले पनि डर, धम्की वा लोभमा परेर आफ्नो मतदान अधिकार गुमाउनु हुँदैन। परिवर्तन आफैंबाट सुरु गर्नुपर्छ।”
चौधरीले महिला र चौधरी समुदायको प्रतिनिधित्व गर्ने भएकै कारण आफूलाई उम्मेदवारीका लागि अवरोध सिर्जना गरिएको आरोप पनि लगाइन्। “मलाई टिकटबाट वञ्चित गरियो, तर म टुटिनँ। म विद्यार्थीहरूको आशा र भरोसाका लागि उम्मेदवार बनेकी हुँ,” उनले भनिन्।
उनले केही व्यक्तिहरूले आफू उम्मेदवारी फिर्ता लिएको भन्दै झूठा प्रचार गरेर चरित्र हत्या गर्न खोजेको आरोपसमेत लगाएकी छन्।
अन्त्यमा, उनले उम्मेदवारी फिर्ता लिएका साथीहरूलाई धन्यवाद दिँदै अझै पनि साथ र सहयोगको अपेक्षा राखेकी छन्।
चौधरी यसअघि नेविसंघबाटै निर्वाचित भएकी थिइन्, तर यसपटक संस्थाले सन्तोष पन्तलाई उम्मेदवार बनाएपछि उनले स्वतन्त्र उम्मेदवारी दिएकी हुन्।
क्याम्पसमा स्ववियु निर्वाचन आगामी चैत २७ गते हुने तय भएको छ।
