धनगढी- कैलालीको धनगढी उपमहानगरपालिकाले सामुदायिक (छाडा छोडिएका) कुकुरको बन्ध्याकरण अभियान सुरु गरेको छ । सामुदायिक कुकुरका कारण समस्या सिर्जना भएपछि उपमहानगरपालिकाले नियन्त्रणका लागि बन्ध्याकरण अभियान अघि बढाएको हो ।
धनगढी उपमहानगरपालिकाले केही वर्षदेखि सामुदायिक कुकुर नियन्त्रण अभियान सञ्चालन गर्दै आएको छ । सामुदायिक कुकुर नियन्त्रणका लागि बन्ध्याकरण सबैभन्दा प्रभावकारी उपाय रहेको उपमहानगरपालिकाले जनाएको छ ।
उपमहानगरपालिकाले यही चैत्र १७ गते आइतबारदेखि सामुदायिक कुकुर बन्ध्याकरण शिविर सञ्चालन गरेको छ । उपमहानगरपालिकाले चार दिन (बुधबार) सम्म सञ्चालन हुने शिविरमा दुई सय ८० वटा सामुदायिक कुकुरको बन्ध्याकरण गर्ने लक्ष्य लिएको जनाएको छ । उपमहानगरपालिका कार्यालयका अनुसार शिविर सञ्चालन गरेको पहिलो दिन आइतबार ९५ वटा सामुदायिक कुकुरको बन्ध्याकरण गरिएको छ ।
उपमहानगरपालिका पशुसेवा शाखा प्रमुख डाक्टर समीरकुमार ठाकुरले चार दिनसम्म चल्ने शिविरमा छाडा छोडिएका कुकुरहरूको मात्र बन्ध्याकरण गरिनेछ । छाडा छोडिएका कुकुरहरूको संख्या नियन्त्रण गर्न उपमहानगरपालिकाले हरेक वर्ष बध्याकरण शिविर आयोजना गर्दै आएको पशुसेवा शाखा प्रमुख ठाकुरले बताए ।
