धनगढी- बझाङको छबिसपाथिभेरा गाउँपालिका-७ बुड्खोरी घर भएका सञ्चारकर्मी सुन्दर धामीलाई पितृ शोक परेको छ । उनका ५० वर्षीय पिता धनबहादुर धामी (धुना) को उपचारका क्रममा सेती प्रादेशिक अस्पताल धनगढीमा निधन भएको हो ।
धामी गत फागुन २९ गते पहाड होलीको दिन बाख्राका लागि स्याउला काट्ने क्रममा रुखबाट लडेर गम्भीर घाइते भएका थिए ।
रुखबाट लडेर गम्भीर घाइते धामीलाई घटना घटे लगत्तै उपचारका लागि जिल्ला अस्पताल बझाङ लगिएको थियोे,, त्यहाँ उपचार सम्भव नभएपछि तत्कालै धनगढी रेफर गरिएको थियोे । सेती प्रादेशिक अस्पतालमा उपचाररत धामीको मंगलबार दिउँसो निधन भएको मृतकका भतिजा तथा वडाध्यक्ष बिजय बहादुर धामीले जानकारी दिए ।
उनको दाहसंस्कार बुधबार बिहान ८ बजे गौरीगंगा नगरपालिका ४ राजीपुर गौरीगंगा मसानघाटमा गरिने भएको छ ।
सञ्चारकर्मी सुन्दर काठमाडौंमा बसेर पत्रकारिता गर्दै आएका छन् ।
उनी अहिले सुनौलो नेपालमा कार्यरत छन् । काठमाडौंलाई कर्मथलो बनाएर बस्दै आएका सुन्दर बुबा घाइते खबर पाएपछि यहीँ आइतबार धनगढी आइपुगेका थिए ।
