धनगढी- बझाङको केदारस्यूँ गाउँपालिका-९ झोतामा रहेको बझाङदीप क्याम्पसको स्ववियु सभापतिमा सुरेश राज जैसी निर्वाचित भएका छन् ।
आज भएको स्वतन्त्र विद्यार्थी युनियन (स्ववियु ) निर्वाचन मा नेकपा एकीकृत समाजवादी निकट अनेरास्ववियू र नेकपा माओवादी केन्द्र निकट अखिल क्रान्तिकारीका साझा उम्मेदवार अनेरास्ववियूका जैसी सभापति पदमा १ सय २५ मत ल्याएर निर्वाचित भएका हुन् ।
उनका निकटतम प्रतिद्वन्द्वी नेपाली काँग्रेस निकट नेपाल विद्यार्थी संघ नेविसंघ र नेकपा एमाले निकट अनेरास्ववियुका साझा उम्मेदवार नेविसंघका रोशन भण्डारीले १ सय ९ मत र विप्लव निकट अखिल समाजवादीका अक्कल धामीले ६३ मत प्राप्त गरे ।
त्यस्तै सचिवमा अनेरास्ववियूका विपिन रोकाया निर्वाचित भएका छन् । रोकाया नेविसंघ र अनेरास्ववियुका साझा उम्मेदवार धनबहादुर धामी र अखिल समाजवादीका नवीन जेठारालाई पराजित गर्दै स्ववियु सचिवमा निर्वाचित भएका हुन् । निर्वाचित रोकायाले १ सय ३४, धामीले १ सय ९, र जेठाराले ४६ मत प्राप्त गरे ।
कोषाध्यक्षमामा रबिना कुमारी धामी निर्वाचित भएकी छन् । १ सय २६ मत सहित अखिल क्रान्तिकारीकी धामी स्ववियु कोषाध्यक्षमा निर्वाचित भएकी हुन् ।
उनका प्रतिद्वन्द्वी नेविसंघ र अनेरास्ववियुका साझा उम्मेदवार मनिषा बोगटीले ९५ मत र अखिल समाजवादीकी सुष्मिता थापाले ६९ मत प्राप्त गरिन् ।
जम्मा ३ सय ३४ मत खसेको थियोे जसमा १७ मत बदर भएको छ ।
यसअघिको स्ववियु निर्वाचनको सभापति पद अखिल समाजवादीका कमल थापाले जितेका थिए । उनको कार्यकाल सकिएपछि मंगलबार स्ववियु निर्वाचन भएर नयाँ नेतृत्व चयन भएको छ ।
