धनगढी- बाजुरा र दार्चुलामा सवारी दुर्घटना हुँदा २ जना घाइते भएका छन् । बाजुरामा मंगलवार दिउँसो करिब साढे ४ बजेको समयमा बडीमालिका नगरपालिका ६ बिरेखोला नजिकै मोटरसाइकल दुर्घटनामा हुँदा एक जना घाइते भएका छन् ।
जिल्लाको बुढीगंगा नगरपालिका ९ जुवापानीका अन्दाजी २२ बर्षका राजेन्द्र सिंहले चलाएको मोटरसाइकल दुर्घटना हुँदा चालक सिंह गम्भीर घाइते भएका हुन । सदरमुकाम मार्तडीबाट जादैँ गरेको अवस्थामा सिंहले चलाएको सु.प. प्र ०१–०११ प ६९४० नम्बरको मोटरसाइकल अन्यन्त्रित भएर दुर्घटना हुँदा उनी गम्भीर घाइते भएका प्रहरीले जनाएको छ । उनको टाउको, खुट्टामा चोट लागेको छ ।
घाइते युवकको अहिले जिल्ला अस्पतालमा उपचार भइरहेको र अवस्था गम्भीर रहेको बताइएको छ ।
यस्तै दार्चुलामा जीपले मोटरसाइकललाई ठक्कर दिदा एक जना घाईते भएका छन् ।
जिल्लाको महाकाली राजमार्ग अन्तरगत मालिकार्जुन गाउँपालिका- १ बेतमा गोकुलेश्वरबाट दार्चुलातर्फ जाँदै गरेको दलिसिंह खत्रीले चलाएको सु.प.प्र.०१००१ ज १५८३ नम्बरको जीपले विपरित दिशाबाट आउदै गरेको मालिकार्जुन गाउँपालिका-१ का ६७ वर्षीय दुर्गासिंह सामन्तले चलाएको लु ३७ प १८७७ नम्बरको मोटरसाइकललाई ठक्कर दिदा चालक सामन्त घाईते भएको जिल्ला प्रहरी कार्यालय दार्चुलाका प्रहरी निरीक्षक एवम् सूचना अधिकारी कान्तीराज जोशीले जानकारी दिए ।
मोटरसाईकल चालक सामन्तको टाउको र खुट्टामा चोट लागेको छ । उनलाई उपचारको लागी जिल्ला अस्पताल दार्चुला पठाइएको छ । त्यस्तै जीप चालक खत्री र जीपलाई प्रहरीले नियन्त्रणमा लिएको छ ।
