बझाङ: जिल्ला अस्पताल बझाङमा रेबिजविरुद्धको भ्याक्सिन (ARV) अभाव भएपछि कुकुर तथा अन्य जनावरको टोकाइबाट घाइते भएका बिरामीहरू उपचार नपाएर फर्किन बाध्य भएका छन्। प्रदेश स्वास्थ्य आपूर्ति व्यवस्थापन केन्द्र, धनगढीले समयमा खोप आपूर्ति नगर्दा जिल्लावासीले स्वास्थ्य संकट बेहोर्नुपरेको छ।
बझाङका पत्रकार उत्तम कुमार थापाका तीन वर्षीय छोरालाई आज बिहान घर नजिकै कुकुरले टोकेपछि तत्काल रेबिज भ्याक्सिन लगाउन जिल्ला अस्पताल पुर्याइएको थियो। तर अस्पताल प्रशासनले खोप सकिएको जानकारी दिँदै तत्काल उपचार सम्भव नभएको बतायो।
यसैगरी, जिल्लामा दैनिक ५-६ जना बिरामीहरू विभिन्न घरपालुवा तथा छाडा जनावरबाट टोकिने गरेका छन्। तर प्रदेश स्वास्थ्य आपूर्ति केन्द्रबाट समयमै खोप आपूर्ति नहुँदा उनीहरू उपचार बिना नै घर फर्किन बाध्य भएका छन्।
बझाङ जिल्ला अस्पतालका अनुसार, धनगढीस्थित प्रदेश स्वास्थ्य आपूर्ति व्यवस्थापन केन्द्रबाट आवश्यक खोप आपूर्ति हुन नसकेको कारण निःशुल्क भ्याक्सिन दिन नसकिने अवस्था आएको हो।
“हामीले पटक–पटक माग गर्दा पनि आपूर्ति केन्द्रले भ्याक्सिन पठाउन सकेको छैन। यसको मार बिरामीहरूले बेहोर्नुपरिरहेको छ,” बझाङ जिल्ला अस्पतालका मेसु नवराज जोशीले बताए ।
अस्पताल प्रशासनले बिरामीहरूलाई बजारबाट भ्याक्सिन किन्न सल्लाह दिएको छ, जसले आर्थिक रूपमा कमजोर वर्गका बिरामीहरूलाई थप मारमा पारेको छ।
प्रदेश स्वास्थ्य आपूर्ति व्यवस्थापन केन्द्रका सूचना अधिकारी जयन्द्र बोगटीका अनुसार संघीय सरकारले नै भ्याक्सिन पठाउने भएकाले ढिलाइ भएको हो।
“केही दिनअघि धनगढीमा पनि भ्याक्सिन अभाव थियो। माथिबाट आपूर्ति ढिलो भएकाले समस्या देखिएको हो। तर आज बेलुकासम्म भ्याक्सिन धनगढी आइपुग्नेछ र भोलिदेखि सबै जिल्लामा पठाइनेछ,” बोगटीले जानकारी दिए।
रेबिज एक प्राणघातक रोग हो, जसको समयमा उपचार नभए मृत्यु अनिवार्य छ। कुकुर वा अन्य जनावरको टोकाइपछि समयमै भ्याक्सिन लगाउनु नै एकमात्र सुरक्षा उपाय हो। तर हाल खोप अभाव भएपछि जिल्लामा महत्त्वपूर्ण सार्वजनिक स्वास्थ्य संकटको अवस्था सिर्जना भएको छ।
