धनगढी- बझाङको छबिसपाथिभेरा गाउँपालिका-७ ले स्याउका बोटहरू अनुदानमा वितरण गर्न थालेको छ ।
वडा कार्यालयले फागुन १५ गतेदेखि ५० प्रतिशत अनुदानमा बोटहरू वितरण गर्न थालेको हो ।
उच्च हिमाली क्षेत्रमा हुने गोल्डेन डेलिसिएस, र अन्ना जातको स्याउका बोटहरू ५० प्रतिशत वडा र ५० प्रतिशत कृषकको लगानीमा वडा कार्यालय मार्फत वितरण भइरहेको छ।
स्याउ खेती गर्ने इच्छुक कृषकहरूले वडा कार्यालयमा सम्पर्क वडाले अनुरोध गरेको छ ।
वडाले स्थानीय नागरिकलाई कृषिमा रोजगारी सिर्जना गर्ने गरि काम गरिरहेको वडा सचिव धनशेर बुढाले बताए ।
उनलेे भने हामीले वडाको तल्लो क्षेत्र खोरीमा बेमौसमी तरकारी खेती र माथिल्लो क्षेत्रमा आलु बन्दा लगायत फलफूल खेतीमा स्याउलाई जोड दिएका छौ ।
अनुदानमै विगत ३ वर्षदेखि स्याउका बोटहरू वितरण गर्दै आएको र हालसम्म ७ हजार बोट वितरण गरिएको बुढाले बताए ।
अहिले अनुदानमा वितरण भइरहेका बोटहरू किसानको माग अनुसार वितरण गरिने छ ।
पछिल्लो समय स्थानीय जग्गा बाझो छोडेर विदेश पलायन हुने क्रम बढेको छ बुढाले भने, कतिपय वडावासी भारतका विभिन्न ठाउँमा गएर स्याउ टिपेर जीविका चलाइ रहेका छन्, उनीहरूलाई आफ्नै क्षेत्रमा उत्पादन गरेर आम्दानी लिन सकिन्छ भन्ने सन्देश दिन वडा लागिपरेको हो ।
स्थानीय नागरिकलाई स्वदेशमै बाझो जग्गामा स्याउ उत्पादन गर्न लगाए कृषिमा आत्मनिर्भर गर्ने वडाको लक्ष्य रहेको वडाध्यक्ष विजय बहादुर धामी बताए ।
अध्यक्ष धामीले कामना टुडे संग भने वडाबाट आलु,बन्दा,टमाटर, गोलभेडा लगायतका तरकारीबाट किसानले १० हजार देखि १ लाखसम्मको आम्दानी लिइरहेका छन्, अहिले हाम्रो टिम त्यसैलाई थप बनाएर स्थानीयलाई कृषिमा आत्मनिर्भर बनाउने तर्फ लागि परेका छ ।
यसैगरी वडा कार्यालयले छोटो समयमा फल्ने स्याउको पनि परिक्षण गरिरहेको छ । वडामा दुई वर्षअघि लगाएका स्याउका बोटहरू फुलेका छन् । फल लाग्ने नलाग्ने यकिनहुन बाँकी छ ।
अहिलेसम्म वडामा परिक्षणका लागि विभिन्न जातका स्याउका बोटहरू लगाइएको छ ।
वडावासीलाई स्याउ खेती सम्बन्धि तालिम पनि प्रदान गरिएको छ । यस्तै वडाका कृषिमा आत्मनिर्भर हुने इच्छुक कृषकलाई आवश्यक टनेल , बिउबिजन,विषादी पल, वितरण गर्दै आएको वडा कार्यालयले जनाएको छ।
