बझाङ : नेपाल निजामती कर्मचारी संगठन बझाङको १३औँ जिल्ला अधिवेशनले मुकेश कुमार थापालाई अध्यक्षमा सर्वसम्मत रूपमा चयन गरेको छ। थापाको नेतृत्वमा संगठनलाई सुदृढ र कर्मचारीको हकहितमा अझ प्रभावकारी बनाउने प्रतिबद्धता व्यक्त गरिएको छ।
अध्यक्ष थापासँगै १९ सदस्यीय जिल्ला समिति गठन भएको छ। समितिमा धर्मराज जोशी उपाध्यक्ष, बिन्दु चन्द उपाध्यक्ष (महिला), दिपक बोहरा सचिव, नरेश ओली उपसचिव, र हर्क बहादुर सार्की कोषाध्यक्ष चयन भएका छन्।
नवनिर्वाचित अध्यक्ष मुकेश कुमार थापाले आफ्नो सम्बोधनमा संगठनको उन्नयन र कर्मचारीहरूको हकअधिकार सुनिश्चित गर्न सबै कर्मचारीहरूलाई एकताबद्ध बनाउन नयाँ योजनाहरू कार्यान्वयन गर्ने प्रतिबद्धता व्यक्त गरे। “संगठनलाई थप सुदृढ बनाउँदै, सबै कर्मचारीको मञ्चका रूपमा विकास गर्न निरन्तर काम गरिनेछ,” थापाले भने।
थापा संगठनभित्रको अनुभवी नेतृत्वकर्ता हुन्। उहाँले विगतमा संगठनका विभिन्न तहमा महत्त्वपूर्ण भूमिका निर्वाह गर्दै संगठनका उद्देश्य प्राप्तिमा महत्वपूर्ण योगदान दिनु भएको छ। सहभागीहरूले थापाको नेतृत्वमा संगठनले झनै प्रभावकारी भूमिका खेल्ने विश्वास व्यक्त गरेका छन्।
कार्यक्रममा सहभागी पदाधिकारी र सदस्यहरूले नयाँ समितिले संगठनलाई अझ संगठित र प्रगतिशील बनाउने विश्वास व्यक्त गरे। अधिवेशनले जिल्ला समितिको नेतृत्वलाई थप उचाइमा पुर्याउने लक्ष्यका साथ सम्पन्न भएको छ।
नयाँ नेतृत्वले छिट्टै पहिलो बैठक राखी संगठनका प्राथमिकताहरूलाई अघि बढाउने योजना बनाउने निर्णय गरेको छ।
