बझाङ, साईपाल – “स्वास्थ्यका लागि खेलकुद, राष्ट्रका लागि खेलकुद” भन्ने मुल नाराका साथ साईपाल गाउँपालिकामा भइरहेको अन्तरविद्यालय राष्ट्रपति रनिङशिल्ड प्रतियोगिता एक पछिल्लो विवादका कारण नराम्ररी प्रभावित भएको छ। धलौन माध्यमिक विद्यालय र काँडा माध्यमिक विद्यालयका विद्यार्थीबीच टाउकोमा ढुंगाले हानेर चोटपटक गराउने घटनाले सुरु भएको विवादले गम्भीर रूप लिएको छ।
घटनापछि प्रतियोगिता स्थगित गर्दै बसेको बैठकले दुबै विद्यालयका विद्यार्थीलाई खेलकुदबाट निष्कासन गर्ने सहमति जुटाएपछि खेल पुनः सुरु भएको थियो। तर, विवादले नयाँ मोड तब लियो जब साईपाल गाउँपालिकाका पूर्व अध्यक्ष राजेन्द्र धामीले खेलकुद क्षेत्रमा हस्तक्षेप गर्दै आफ्नो व्यक्तिगत असन्तुष्टिलाई प्राथमिकता दिए।
राजेन्द्र धामीले आफूलाई ढिला आसनग्रहण गराइएको विषयलाई लिएर असन्तुष्टि जनाउँदै प्रतियोगिता सञ्चालन भइरहेको खेल मैदानमा नै हस्तक्षेप गरे। उनी धलौन माध्यमिक विद्यालयका विद्यार्थी, शिक्षक, र अभिभावकलाई उक्साउँदै सहमतिमा भएको निर्णयविपरीत गतिविधि गर्न थाले।
“मलाई ढिला आसनग्रहण गरायो” भन्दै सार्वजनिक रूपमा गुनासो गरिरहेका धामीले खेल क्षेत्रमा पुगेपछि खेलकुद रजिस्टर च्यातेका थिए। त्यसपछि उनले आफ्ना क्षेत्रका (धलौन माध्यमिक विद्यालयका) विद्यार्थीलाई खेल खेल्न प्रतिबन्ध लगाउँदै उनीहरूलाई रातारात घर फर्काए। घटनाका प्रत्यक्षदर्शीहरूका अनुसार धामीले “म देखाउँछु तिमीहरूलाई” भन्दै खेलकुद आयोजक, शिक्षक, र विद्यार्थीलाई धम्कीपूर्ण व्यवहार गरेका थिए।
राजेन्द्र धामीको यो कदमले विद्यार्थीको खेलकुदमा सहभागितामाथि गम्भीर प्रश्न खडा गरेको छ। प्रतियोगितामा सहभागिता जनाउन उत्साहित विद्यार्थीलाई घर फर्काउनु र खेलकुद गतिविधिमा अवरोध खडा गर्नुले उनको राजनीतिक स्वार्थका कारण विद्यार्थीमाथि अन्याय भएको स्थानीयवासीको गुनासो छ।
एक अभिभावकले भने, “राजनीतिक स्वार्थका लागि विद्यार्थीलाई खेल्न नदिनु साईपाल गाउँपालिकाको शिक्षा र खेलकुद क्षेत्रको अपमान हो। यो कदमले भविष्यमा विद्यार्थीलाई खेलकुदमा सहभागी हुन डराउने बनाउँछ।”
धामीको हस्तक्षेपपछि प्रतियोगितामा सामेल अन्य विद्यालयका विद्यार्थी र शिक्षकहरूमा समेत असन्तोष फैलिएको छ। स्थानीय शिक्षकले भने, “खेलकुद जस्तो सकारात्मक गतिविधिमा समेत राजनीति घुसाउनु अत्यन्त निन्दनीय हो। यसले सिंगो गाउँपालिकाको छविमा नकारात्मक असर पुर्याउँछ।”
यो घटनाले साईपाल मात्र होइन, बझाङ जिल्लाभरका खेलकुदप्रेमीहरूलाई निराश पारेको छ। जिल्लाभरबाट आएका विद्यार्थी र अभिभावकले खेलकुद क्षेत्रलाई स्वच्छ राख्न र यस्तो प्रकारका हस्तक्षेप रोक्न ठोस नीति बनाउन माग गरेका छन्।
यो घटनाले साईपाल गाउँपालिकामा मात्र होइन, सम्पूर्ण बझाङ जिल्लामा खेलकुद क्षेत्रप्रति स्थानीय नेतृत्व र प्रशासनको प्रतिबद्धतामाथि प्रश्न उठाएको छ। खेलकुदका माध्यमबाट विद्यार्थीको शारीरिक र मानसिक विकासको लागि वातावरण तयार पार्नुपर्नेमा व्यक्तिगत गुनासो र राजनीतिक स्वार्थका कारण खेलकुद गतिविधि प्रभावित हुनु निन्दनीय मात्र नभई आपत्तिजनक हो।
यो घटनाले खेलकुदप्रतिको बेवास्ता र राजनीति हावी हुने परिपाटीलाई उजागर गरेको छ। अब यो घटनाबाट पाठ सिक्दै भविष्यमा यस्तो नदोहोरिनेसमेतका कडा नीति र नेतृत्वमा इमान्दार प्रतिबद्धता देखिन आवश्यक देखिन्छ ।
