राष्ट्रिय स्वास्थ्यकर्मी महासंघ, नेपाल सुदूरपश्चिम प्रदेश समितिको बिस्तारित बैठक आज मिति २०८१ पुष २० गते धनगढीमा सम्पन्न भएको छ। बैठकको अध्यक्षता प्रदेश अध्यक्ष तप्त भण्डारीले गर्नुभएको थियो। प्रमुख अतिथिका रूपमा नेकपा एमाले सुदूरपश्चिम प्रदेश अध्यक्ष कृष्णप्रसाद जैशी उपस्थित हुनुहुन्थ्यो। उहाँले आफ्नो मन्तव्यमा स्वास्थ्यकर्मीहरू समाजको महत्त्वपूर्ण आधारस्तम्भ रहेको उल्लेख गर्दै स्वास्थ्यकर्मीहरूको हक, अधिकार र सुरक्षाका लागि प्रदेश सरकारसँग निरन्तर संवाद गर्न महासंघले अग्रणी भूमिका खेल्नुपर्ने बताउनुभयो।
कार्यक्रममा विशिष्ट अतिथिका रूपमा नेकपा एमाले जिल्ला अध्यक्ष यज्ञ ढुंगाना, प्रदेश समिति सदस्य शान्ति भट्ट जोशी, डा. निरज अर्याल, महासंघ केन्द्रीय समिति सदस्य भरत खाती, ईश्वरी भुसाल, महेश भाट, र मिनबहादुर बिक रहेका थिय ।
राष्ट्रिय फार्मेशि संगठनका सुदूरपश्चिम अध्यक्ष माहा ओम राज जोशीले फार्मेसी पेशा स्वास्थ्य क्षेत्रको अभिन्न अङ्ग भएको र यस क्षेत्रसँग सम्बन्धित विषयमा आफूसहित संगठनले सम्बन्धित निकायहरूको ध्यानाकर्षण गराउँदै आएको स्पष्ट पार्नुभयो। उहाँले फार्मेसी र समग्र स्वास्थ्य क्षेत्र सुधारका लागि संगठित र सामूहिक प्रयास आवश्यक रहेको औंल्याउनुभयो।
बैठकले महत्त्वपूर्ण निर्णय गर्दै माघ महिनाभित्र सुदूरपश्चिमका नौवटा जिल्लाका स्थानीय तह र जिल्ला अधिवेशन सम्पन्न गर्ने तथा फागुन महिनाभित्र प्रदेश अधिवेशन सम्पन्न गर्ने योजना तय गरेको छ।
बैठकमा नौ जिल्लाबाट प्रतिनिधि तथा अध्यक्षहरूले आ-आफ्नो जिल्लाको रिपोर्टिङ गरेका थिए। रिपोर्टिङमा संगठनका वर्तमान अवस्था, चुनौती र समाधानका उपायबारे छलफल भएको थियो।
कार्यक्रम सञ्चालन प्रदेश सचिव रेशम लामिछानेले गर्नुभएको थियो। अतिथिहरूले महासंघले स्वास्थ्य क्षेत्रको सुधार र स्वास्थ्यकर्मीहरूको हकहित सुनिश्चित गर्न गरेको योगदानको प्रशंसा गर्दै आगामी दिनमा थप सक्रियता देखाउनुपर्नेमा जोड दिए।
