धनगढी: डडेल्धुरामा मृत भेटिएकी किशोरीको हत्या आरोपमा प्रहरीले एक जनालाई पक्राउ गरेर थप अनुसन्धान गरिरहेको छ। सदरमुकाम अमरगढी नगरपालिका–७ की १४ वर्षीया आरती भट्टराईको हत्या आरोपमा ५८ वर्षीय टेकबहादुर भण्डारी पक्राउ परेका थिए। अहिले उनीमाथि थप अनुसन्धान जारी छ। प्रहरीले अहिले पोस्टमार्टम रिपोर्ट आइसकेको र थप रगत, कपाल तथा भेजाइनल स्वाव परीक्षणका लागि पठाइएको जनाएको छ। डडेल्धुरा जिल्ला प्रहरी कार्यालयका प्रमुख प्रहरी नायव उपरीक्षक सुगन्ध श्रेष्ठका अनुसार भण्डारीले भट्टराईको हत्या भने आफूले गरेको स्वीकारेका छन्। पोखरा बजारमा भण्डारी पुस्तक एण्ड स्टेस्नरी पसल सञ्चालन गरिरहेका भण्डारीले पसलभित्रै किशोरीको शनिबार हत्या गरेको स्वीकार गरेका हुन्।
आवेशमा आएर किशोरीको घाँटी थिचेर हत्या गर्नुको कारण भने अझै नखुलेको बताइन्छ। तर स्थानीयले किशोरीको बलात्कारपछि हत्या गरिएको दावी गरेका छन्। उता प्रहरीले भने सो विषयलाई प्रष्ट भनिसकेको छैन। प्रहरीले घर्षण भएको पोस्टमार्टमले देखाएपनी बलात्कार नै नभएको जनाएको छ। जबरजस्ती करणी गर्न खोज्दा किशोरीको प्रतिकारपछि आवेशमा आएर हत्या गरेको हुनसक्ने अनुमान प्रहरीको छ।
प्रहरीका अनुसार ती किशोरीले आफू भारत जान लागेको बताउँदै केही रकम चाहिएको भन्दै भण्डारीलाई दशैंअघि २३ गते पनि भेटेको प्रारम्भिक अनुसन्धानमा देखिएको छ। किशोरी आरती २५ गते दिउँसोसम्म घरमै रहेको र ४ बजे गहुँ पिस्न स्थानीय पोखरा बजारको मिलमा गएकी थिइन्। त्यसबेला उनले बजारमा चप्पल पनि किनेको पाइएको छ। भण्डारीसँग किशोरीको एक वर्ष अघिदेखि चिनजान रहेको उल्लेख गर्दै प्रनाउ श्रेष्ठले भने ‘किशोरी भण्डारीको पसलमा साँझ ५ बजेतिर पुगेको देखिन्छ, कुराकानीकै क्रममा आवेशमा हत्या भएको भनिएको छ।’
त्यसपछि भण्डारीले आरतीको शव प्लाष्टिकको बोरामा प्याक गरेर पसल बाहिर राखेका थिए। हतारमा पसल बन्द गरेर भाग्ने क्रममा उनको मोटरसाइकल पसल अगाडि नै ढलेपछि नजिकैका सुरक्षाकर्मीले उठाउन सहयोग गरे। आफ्नै पसल अगाडि शव राखेका उनी त्यसपछि डडेल्धुरा सदरमुकाम हुँदै पोखराबाट १० किलोमिटर टाढाको स्याउले बजार पुगेको अनुसन्धानबाट खुलेको छ। प्रहरी स्रोत भन्छ– पसल बाहिर शव राखेर निस्किएका उनले तीन किमी पर पुगेपछि फर्केर तुफानडाँडामा तीन घण्टा मदिरा पिएका थिए। राति ९ बजेतिर फर्केर पसल खोले। म।१ प १४५४ नम्बरको आफ्नै मोटरसाइकलमा शवको बोरा बाँधेर व्यवस्थापन गर्ने तयारीमा रहेका बेला कुकुर भुक्न थालेपछि भण्डारी अलमलमा परेपछि मोटरसाइकल नालीमा ढलेको देखिन्छ।
त्यसपछि पोखरा बजारको १० मिटर पूर्वमा शव फालेर भण्डारी भागे। तर, उनको टोपी र चप्पल भने शव फालेकै ठाउँमा छुट्न पुग्यो। शव नजिकै भेटिएको आरोपीको टोपी र चप्पलका कारण प्रहरीले भोलिपल्ट बिहान शौचालयमा लुकेको अवस्थामा भण्डारीलाई पक्राउ गरेको हो।
