बैतडी- बैतडीमा छोटो दूरीमा सञ्चालन हुने सार्वजनिक सवारीसाधनको नयाँ भाडादर लागू गरिएको छ। यातायात व्यवसायीले विभिन्न बहाना देखाउँदै यात्रुसँग बढी भाडा असुल गरिरहेको जनगुनासो बढेपछि भाडा समायोजन मापदण्डका आधारमा नयाँ दर निर्धारण गरिएको जिल्ला प्रशासन कार्यालयले जनाएको छ।
मंगलबार जिल्ला प्रशासन कार्यालयमा यातायात व्यवसायीका प्रतिनिधिसहित बसेको बैठकले ४० वटा रुटका लागि नयाँ भाडादर तय गरेको हो। प्रशासनले सबै सार्वजनिक सवारीसाधनमा नयाँ भाडादरको सूची अनिवार्य रूपमा टाँस्न निर्देशन दिएको छ। तोकिएकोभन्दा बढी भाडा असुले प्रचलित कानुनअनुसार कारबाही गरिने चेतावनी पनि दिइएको छ।
प्रशासनका अनुसार ४० रुटबाहेक जिल्लाका कच्ची सडकमा सञ्चालन हुने सवारीका लागि प्रतिकिलोमिटर १० रुपैयाँ २ पैसाका दरले भाडा निर्धारण गरिएको छ।
नयाँ भाडादरअनुसार गोठलापानी-सतबाँझको भाडा १४४ रुपैयाँ, गोठलापानी–खोड्पे ३६० रुपैयाँ, झुलाघाट–बित्थड ६६० रुपैयाँ, गोठलापानी–गोकुलेश्वर ४४४ रुपैयाँ, ढोल्यामोड-पुर्चौंडी हाट २०० रुपैयाँ तथा गोठलापानी-डडेल्धुरा ५०४ रुपैयाँ कायम गरिएको छ।
जिल्ला प्रशासन कार्यालयले तोकिएकोभन्दा बढी भाडा नतिर्न तथा जबरजस्ती बढी भाडा तिर्न लगाइए प्रमाणसहित उजुरी गर्न यात्रुलाई आग्रह गरेको छ।
सामाजिक सञ्जालमार्फत सार्वजनिक गरिएको नयाँ भाडादरप्रति नागरिकले सकारात्मक प्रतिक्रिया जनाउँदै यसलाई प्रभावकारी रूपमा कार्यान्वयन गर्न प्रशासन र यातायात व्यवसायीसँग माग गरेका छन्।
