बझाङ- बझाङको बित्थडचिर गाउँपालिका-६ का स्थानीय बासिन्दालाई खानेपानी संकलन तथा भण्डारणका लागि ड्राम वितरण गरिएको छ। वडाको पाणपाखा स्थित युपि ओजेना बस्तीवासीमा खानेपानीको सहज पहुँच सुनिश्चित गर्न वडा कार्यालयले खानेपानी संकलन तथा भण्डारणका लागि ड्राम वितरण गरेको हो ।
उक्त टोलमा सौर्य ऊर्जामार्फत लिफ्टिङ प्रणालीबाट खानेपानी आपूर्ति हुँदै आएको छ। घाम लागेको समयमा पर्याप्त पानी उपलब्ध भए पनि बादल लाग्दा सौर्य ऊर्जाको क्षमता घट्ने र पानी आपूर्ति बन्द हुने समस्या स्थानीयले लामो समयदेखि भोग्दै आएका थिए।
सोही समस्यालाई मध्यनजर गर्दै वडा कार्यालयले स्थानीयलाई पानी संकलन गरी आवश्यक समयमा प्रयोग गर्न मिल्नेगरि ५ सय लिटरको २० वटा ड्राम वितरण गरेको छ ।
टोलबासीले सुरक्षित तथा स्वच्छ खानेपानी संकलन गरी प्रयोग गर्न सकून् भन्दै ड्राम वितरण गरिएको वडाध्यक्ष हरिश खड्काका बताउनुभयो । सौर्य ऊर्जामा आधारित खानेपानी प्रणाली भएकाले मौसम प्रतिकूल हुँदा पानी आपूर्तिमा समस्या हुने गरेको छ। त्यसैले स्थानीयले पानी भण्डारण गर्न सहज होस् भनेर ड्राम वितरण गरेका हौं, उनले भने।
ड्राम वितरणपछि स्थानीयवासीले घाम लागेको समयमा पानी संकलन गरी आवश्यकता अनुसार प्रयोग गर्न सक्ने भएका छन्। यसले खानेपानीको अभाव कम गर्न तथा दैनिक जीवनलाई सहज बनाउन सहयोग पुग्ने देखिन्छ ।
