मृतक परिवार ठगेको आरोपमा व्यापारी मल्ल पक्राउ

बझाङ- बझाङका ठूला व्यापारी सुरत बहादुर मल्ल पक्राउ परेका छन्। मृतकको परिवारलाई ठगेको आरोपमा उनी पक्राउ परेका हुन् ।
अहिले उनलाई पिडितकाे उजुरीका आधारमा सदरमुकाम चैनपुरबाट पक्राउ गरी जिल्ला प्रहरी कार्यालयमा राखिएको छ।
प्रहरीका अनुसार केही समयअघि जिल्लाको झनाना भएको ट्याक्टर दुर्घटनामा जाजरकोटका लोकेन्द्र घर्ती र सञ्जय बुढाको मृत्यु भएको थियो। त्यसपछि जिल्ला प्रशासन कार्यालयमा ट्याक्टरधनी र ठेकेदारले मृतकका परिवारलाई जनही पाँच लाख रुपैयाँ दिने सम्झौता भएको थियो।
पीडित परिवारले जनही पाँच लाखको चेक पाए पनि, प्रशासनको गेटभन्दा तल पुग्नेबित्तिकै मल्लले चेक खोस्न लगाएको र मात्र दुई–दुई लाख रुपैयाँ बुझाएको आरोप लगाएका छन्। बाँकी रकम नदिएर उल्टै धाकधम्की र कुटपिट गरेको भन्दै मृतकका बुवा तुले घर्ती र कृष्ण बहादुर बुढाले उजुरी दिएका हुन्।
प्रमुख जिल्ला अधिकारी कैलाश ठकुराठीले पीडितलाई न्याय दिलाउने र दोषीलाई कारबाही गर्ने प्रतिबद्धता जनाएका छन्। घटनामा संलग्न अरुण थपलियाको खोजी भइरहेको प्रहरीले जनाएको छ।