कञ्चनपुर- अनुदानमा कृषि सामग्री उपलब्ध गराउने भन्दै ठगिएका किसानहरूले कञ्चनपुरको लालझाडीस्थित दुई सहकारी कार्यालयमा तालाबन्दी गरेका छन्।
अनमोल कृषि सहकारी र दोदा साना किसान सहकारीले सुरो नेपाल नामक गैरसरकारी संस्थाको सहकार्यमा ५० प्रतिशत अनुदानमा पावरटिलर, पानी तान्ने मोटर र चारा मेसिन दिने भन्दै साढे तीन सय किसानबाट अढाई करोड रुपैयाँ संकलन गरेका थिए।
तर, एक वर्षसम्म न त उपकरण प्राप्त भए, न त पैसा फिर्ता, जसपछि आक्रोशित किसानहरूले बुधबार सहकारीमा तालाबन्दी गरेका हुन्।
गत वर्ष अनमोल सहकारीले ११० किसानबाट ४८ लाख ४६ हजार र दोदा साना किसान सहकारीले २५० किसानबाट एक करोड ९३ लाख रुपैयाँ संकलन गरेका थिए।
कृषि सामग्री खरिदका लागि किसानहरूले कृषिउपज बिक्री, ऋण र आफन्तबाट सहयोग लिएर रकम तिरेका थिए। तर बारम्बार माग्दा पनि पैसा नपाएपछि किसानहरू समस्यामा परेका छन्।
किसान अर्जुन चौधरीले “धेरैपटक माग्दा पनि केही नदिएपछि बाध्य भएर तालाबन्दी गरेका हौं,” भने। अर्का किसान खडक रानाले “आधुनिक कृषि गर्न खोज्दा झन् धोका पाएँ,” भनी गुनासो गरे। स्थानीय रतनसिंह रानाले सुरो नेपालका कर्मचारीहरूले किसानको रकम उठाएर विदेश घुमेको दाबी गरेका छन्।
कञ्चनपुर प्रहरी प्रवक्ता सागर बोहराले ठगीसम्बन्धी अनुसन्धान जारी रहेको बताए। उनका अनुसार सुरो नेपालका अध्यक्ष सुशीला खड्का र सहयोगी सुनिता चौधरी पुर्पक्षका लागि थुनामा छन्। सहकारीबाट टीकाराम चौधरी र नवराज ओझाविरुद्ध पनि उजुरी परेको छ।
यसैबीच, सुरो नेपालको नाममा कैलाली जिल्लाका किसानहरू पनि ठगिएको उजुरी परेका छन्।
