नवलपरासी– बुटवल–नारायणगढ सडकअन्तर्गत नवलपरासीको दाउन्ने खण्ड एक वर्षमा ६३ पटक अवरुद्ध भएको छ। जिल्ला ट्राफिक प्रहरी कार्यालयका अनुसार २०८१ साउनदेखि २०८२ असार मसान्तसम्म सडक पूर्ण वा आंशिक रूपमा पटक–पटक बन्द भएको हो।
दाउन्ने क्षेत्रको विश्वकर्मा मन्दिर, घ्युखोला र त्रियासी मोडजस्ता स्थानहरू पहिरो र हिलोबाट बढी प्रभावित भएका छन्। ट्राफिक प्रमुख जनक बन्जाराका अनुसार सडक विस्तारका लागि गरिएको भित्तो कटानले पहिरोको जोखिम अझ बढाएको छ। घाम लाग्दा धुलो र खाल्डाखुल्डीका कारण पनि यात्रुहरू सधैँ समस्यामा पर्न बाध्य छन्।
गएको पुस २६ गते विनयी खोलाको पुल भत्किँदा सडक झन् अस्तव्यस्त बनेको थियो। असार १९ गते नयाँ पुल सञ्चालनमा आएपछि केही सहजता आएको छ। हाल पर्खाल, कल्भर्ट र ढलानको काम भइरहेको पूर्वी खण्डका सूचना अधिकारी इञ्जिनियर शिव खनालले जानकारी दिए।
गैँडाकोटदेखि दाउन्नेसम्मको ६५ किमी सडकमा बजार क्षेत्रलाई सर्भिस लेनसहित छ लेन र जोखिमयुक्त दाउन्ने क्षेत्रमा तीन लेनको सडक बनाउने योजना छ। चाइना स्टेट इञ्जिनियरिङ कर्पोरेसनले १७ अर्ब रुपैयाँको लागतमा निर्माणको ठेक्का लिएको यो आयोजनाको म्याद तीनपटक थपिइसकेको छ। अब भने यही साउन मसान्तभित्र निर्माण सम्पन्न गर्ने लक्ष्य राखिएको छ। रासस
