बझाङ : बझाङ जिल्लामा शैक्षिक गुणस्तर अभिवृद्धिका लागि व्यापक सहभागिता सहित संयुक्त बैठक सम्पन्न भएको छ । सदरमुकाम चैनपुरस्थित जिल्ला समन्वय समितिको सभाहलमा आयोजित उक्त बैठकमा जयपृथ्वी नगरपालिकाभित्रका सम्पूर्ण विद्यालयका शिक्षक, विद्यालय व्यवस्थापन समितिका अध्यक्ष, अभिभावक संघका पदाधिकारी लगायतको सहभागिता रहेको थियो ।
उक्त बैठक १२ वटै स्थानीय तहमा लागू हुने गरी यही २०८२ वैशाख २४ र २५ गते सञ्चालन गरिएको हो। कार्यक्रम साईपाल विकास समाजको आयोजनामा विश्वखाद्य कार्यक्रमको आर्थिक सहयोग र विश्व शिक्षा नेपालको प्राविधिक सहयोगमा सम्पन्न भएको हो ।
शैक्षिक गुणस्तर सुधारका लागि जयपृथ्वी नगरपालिकाका ४६ वटै विद्यालयका शिक्षक, विद्यालय व्यवस्थापन समितिका अध्यक्षहरू, र अन्य सरोकारवालाहरूको उपस्थिति रहेको थियो । कार्यक्रममा विश्व शिक्षा नेपालका जिल्ला अधिकृत पदमसिँह धामीले गुणस्तरीय शिक्षा आजको आवश्यकता भएको बताउँदै प्रभावकारी शिक्षण प्रणालीका बारेमा मार्गदर्शन गर्नु भयो ।
जिल्ला समन्वय समितिको सभाहलमा सम्पन्न कार्यक्रमको अध्यक्षता जयपृथ्वी नगरपालिका वडा नम्बर १० का अध्यक्ष पुष्पसिंहले गर्नुभयो । प्रमुख अतिथिका रूपमा जिल्ला समन्वय समिति संयोजक नरबहादुर बोहरा रहनुभएको थियो भने विशिष्ट अतिथिमा जयपृथ्वी नगरपालिका उपमेयर सुरज सिंहको उपस्थिति रहेको थियो । कार्यक्रममा विभिन्न विद्यालयका पदाधिकारी, नागरिक समाजका प्रतिनिधि, तथा सञ्चारकर्मीहरूको समेत सहभागिता रहेको थियो ।
साईपाल विकास समाज बझाङ प्रारम्भिक तह सिकाइ कार्यक्रमका संयोजक शिवराज बुढाले कार्यक्रम सञ्चालन गर्नुभएको थियो । त्यस्तै, विश्वखाद्य कार्यक्रमका फिल्ड संयोजक राजेन्द्र बहादुर रसाइलीले विद्यालयमा सञ्चालित दिवा खाजा कार्यक्रमबारे विस्तृत जानकारी गराउनुभएको थियो ।
समन्वय समितिमा सम्पन्न उक्त कार्यक्रममा १८० बढी सहभागी रहेको जानकारी प्राप्त भएको छ । कार्यक्रममा समन्वय प्रमुख नरबहादुर बोहराले पछिल्लो समय सरकारी विद्यालयहरूको गुणस्तर खस्किएको बताउँदै, सबै शिक्षकलाई जिम्मेवार बन्न र गरिब परिवारका छोराछोरीको भविष्यप्रति संवेदनशील रहन चेतावनी दिनुभयो । सहभागीहरूले शिक्षा सुधारका लागि ४८ बुँदे कार्ययोजना प्रभावकारी रूपमा लागू गर्ने प्रतिबद्धता व्यक्त गरेका छन् ।
