धनगढी- चैत २७ गतेदेखि धनगढी रंगशालामा सुरु भएको ‘प्रथम सुदूरपश्चिम प्रदेश कराते प्रतियोगिता–२०८१’ सम्पन्न भएको छ।
सुदूरपश्चिम प्रदेश कराते महासंघको आयोजनामा सम्पन्न प्रतियोगितामा करिब ७०० खेलाडी, ५० जना रेफ्री, प्रशिक्षक र व्यवस्थापकसहित ८०० भन्दा बढी करातेकर्मीको सहभागिता रहेको थियो।
प्रतियोगितामा २५ स्वर्ण पदकसहित कैलाली जिल्ला प्रथम स्थानमा रहँदा, १८ स्वर्ण पदक जित्दै कंचनपुर जिल्ला दोस्रो स्थानमा पुगेको छ। तीन स्वर्ण पदक प्राप्त गर्दै अछाम जिल्ला तेस्रो स्थानमा रहेको छ।
समापन कार्यक्रममा सुदूरपश्चिम प्रदेश सरकारका पूर्व भौतिक पूर्वाधार विकासमन्त्री तथा प्रदेशसभा सदस्य प्रकाशबहादुर देउबाले विजयी खेलाडीहरूलाई पदक र प्रमाणपत्र वितरण गरे।
कार्यक्रममा सुदूरपश्चिम प्रदेश नीति तथा योजना आयोगका सदस्य नृप सुनार, कैलालीका प्रमुख जिल्ला अधिकारी गोगनबहादुर हमाल, जिल्ला खेलकुद समितिका अध्यक्ष ललित खत्रीलगायत विभिन्न खेल संघसंस्था, प्रशिक्षक, सरकारी कर्मचारी, पत्रकारहरूको उपस्थिति रहेको थियो।
कार्यक्रममा पूर्व तेक्वान्दो खेलाडी तथा प्रशिक्षक दीपक उपाध्यायलाई सामाजिक सेवामा योगदान दिएको भन्दै नगदसहित सम्मान गरिएको थियो। उपाध्याय सुदूरपश्चिम प्रदेश सरकारद्वारा स्वास्थ्य दूतमा नियुक्त भइसकेका छन् र उनले हालसम्म १०८ पटक रक्तदान गरिसकेका छन्।
त्यस्तै, जापानमा रहेकी अन्तर्राष्ट्रिय कराते खेलाडी पुष्पा मडैलाई पनि सम्मान गरिएको थियो। उनी हाल जापानमा रहेकाले सम्मान उनका बुवाले ग्रहण गरेका थिए।
प्रमुख अतिथि देउवाले खेलकुदले व्यक्ति अनुशासित बनाउने भन्दै यसको छुट्टै महत्व रहेको बताए। साथै, उनले सुदूरपश्चिममा अझै खेलकुद पूर्वाधारको अभाव रहेकोमा चिन्ता व्यक्त गरे।
उक्त प्रतियोगिताको उद्घाटन सुदूरपश्चिम प्रदेशका मुख्यमन्त्री कमलबहादुर शाहले चैत २७ गते गरेका थिए।
