धनगढी– नेकपा (माओवादी केन्द्र) सुदूरपश्चिम प्रदेशका सह–इन्चार्ज खराज भट्ट र बिना मगरको पद खारेज गरिएको छ। पार्टीको केन्द्रीय कार्यालयमा चैत १८ र १९ गते बसेको बैठकले अबदेखि प्रदेशमा सह–इन्चार्ज पद नराख्ने निर्णय गरेपछि उक्त पद खारेज गरिएको हो।
पद खारेज भएपछि उनीहरूलाई प्रदेश समन्वय कार्यालयको सदस्यका रूपमा जिम्मेवारी दिइने भएको छ। बैठकले सह–इन्चार्ज पदमा रहेका नेताहरूलाई प्रदेश समन्वय कार्यालयमा निरन्तर सक्रिय राख्ने निर्णय गरेको छ।
अबदेखि कार्य विभाजनको जिम्मा प्रदेश समन्वय कार्यालयले लिनेछ। आवश्यक परेमा कार्यालय विस्तार गर्न सकिनेछ भने त्यसका लागि प्रदेश कार्यालयको सिफारिसमा केन्द्रीय कार्यालयले अन्तिम निर्णय गर्नेछ।
बैठकले केन्द्रीय समितिप्रति जबाफदेही हुने गरी सदस्यहरूको कार्य विभाजन गर्ने निर्णय पनि गरेको छ। यस क्रममा प्रदेश समन्वय कार्यालयलाई पहिले तय गरिएको मापदण्डअनुसार नै सञ्चालन गरिनेछ।
यसैबीच, केही जिल्लामा नयाँ इन्चार्ज पनि तोकिएको छ। सुदूरपश्चिम प्रदेश अन्तर्गत बाजुरा जिल्लाको इन्चार्जमा मनलाल खत्रीलाई नियुक्त गरिएको छ।
