अछाम: तुर्माखाँद गाउँपालिका र ईको हिमाल नेपाल को सहकार्यमा सञ्चालित लैङ्गिकमैत्री ‘हिमालयन विद्यालय परियोजना’ अन्तर्गत पालिका स्तरीय किशोरी सञ्जाल गठन गरिएको छ। यस सञ्जालले गाउँपालिकाभित्र किशोरीहरूका हकहित प्रवर्द्धन गर्दै उनीहरूको नेतृत्वदायी क्षमता विकास गर्न महत्वपूर्ण भूमिका खेल्ने अपेक्षा गरिएको छ।
गाउँपालिकाको उपाध्यक्ष विमला कुमारी शाही को सभापतित्वमा सम्पन्न उक्त कार्यक्रममा प्रमुख अतिथि गाउँपालिका अध्यक्ष डम्बर बहादुर बीसी रहेका थिए। कार्यक्रममा विशेष अतिथिका रूपमा निमित्त प्रमुख प्रशासकीय अधिकृत ऐकेन्द्र बहादुर बयक, कार्यपालिका सदस्य झंकार नेपाली र सुनिता शाही, वडा नं. ४ सदस्य रोशना बी.के., ईको हिमालका कार्यक्रम अधिकृत लक्ष्मी के.सी., तथा ईको हिमाल नेपालका कृषि प्राविधिक बिरेन्द्र चन्द को उपस्थिति थियो। कार्यक्रमको सहजीकरण महिला तथा बालबालिका शाखा तथा सामाजिक परिचालक बसन्ती शाही ले गरेकी थिइन्।
गाउँपालिकाभित्रका १७ विद्यालयबाट १७ किशोरी समूहका प्रतिनिधिहरू सहभागी रहेको कार्यक्रममा किशोरीहरूलाई सशक्त पार्दै उनीहरूको भूमिका प्रभावकारी बनाउन विभिन्न छलफल तथा अन्तरक्रिया गरिएको थियो। यस अवसरमा किशोरीहरूको नेतृत्व क्षमता विकास, उनीहरूका अधिकार र अवसरहरूको सुनिश्चितता तथा सामाजिक सशक्तीकरणका विषयमा विशेष छलफल गरिएको थियो।
पालिका स्तरीय किशोरी सञ्जाल गठन गर्दै गायत्री न्यौपाने लाई अध्यक्ष चयन गरिएको छ। उपाध्यक्षमा जानकी बिष्ट, सचिवमा सुनिता बुढा, सह-सचिवमा जेनिसा नेपाली, कोषाध्यक्षमा जयकला बी.के. तथा अन्य १२ जना सदस्यहरू चयन भएका छन्। यस सञ्जालले किशोरीमैत्री वातावरण निर्माण गर्दै उनीहरूका हक, अधिकार र सुरक्षासँग सम्बन्धित गतिविधिहरू सञ्चालन गर्नेछ। साथै, गाउँपालिका स्तरीय कार्यक्रमहरूको सहजीकरण गर्दै किशोरीहरूलाई आवश्यक सहयोग प्रदान गर्ने तथा लैङ्गिक समानता प्रवर्द्धन गर्ने लक्ष्य राखिएको छ।
यस सञ्जालको माध्यमबाट किशोरीहरूले आफूहरूले भोगेका समस्याहरू पहिचान गर्दै समाधानको पहल गर्ने अवसर पाउनेछन्। साथै, आत्मनिर्भरता, नेतृत्व विकास तथा सामाजिक परिवर्तनका अभियानहरूमा किशोरीहरूको सहभागिता बढाउने लक्ष्य रहेको छ। सहभागीहरूका अनुसार, यस प्रकारका सञ्जालहरूले किशोरीहरूलाई आत्मनिर्भर बनाउँदै समग्र समाजको विकासमा योगदान पुर्याउनेछन्।
