धनगढी- कैलालीमा जारी जयपृथ्वीबहादुर सिंह गौरीगंगा राष्ट्रिय फुटबल प्रतियोगितामा बागमती प्रदेश सेमिफाईनल प्रवेश गरेको छ ।
गौरीगंगा नगरपालिका–८ मा रहेको गौरीगंगा–११ स्पोर्टस क्लबको खेलमैदानमा आज शुक्रबार भएको खेलमा गण्डकी प्रदेशलाई ३–१ ले हराउँदै बागमती प्रदेश अन्तिम चार अर्थात (सेमिफाइनल) मा प्रवेश गरेको हो ।
बागमती प्रदेशको जितका लागि सानु तामाङले दुई गोल गरे । खेलको ४४ औं मिनेटमा पहिलो गोल गरेका सानुले ५१ औं मिनेटमा दोस्रो गोल गरेका थिए । बागमतीका लागि मिशान लामाले खेलको ८८ औं मिनेटमा एक गोल गरेको थिए । गण्डकी प्रदेशका लागि मिशान थापा मगरले एक गोल फर्काएका थिए । खेलमा उत्कृष्ट प्रदर्शन गरेका बागमतीका मिशान थापा म्यान अफ द म्याच भएर पाँच हजार सहित ट्रफी पाएका छन् ।
भोली सनिवार अन्तिम क्वाटरफाईनल खेल हुनेछ । जसमा कोशी प्रदेशको गाईघाट फुटबल क्लब र लुम्बीनी प्रदेशको राईजिङ स्टार क्लब बिच प्रतिस्पर्धा हुनेछ ।
प्रतियोगिताको विजेताले ५ लाख नगद सहित ट्रफी पाउनेछ भने उपविजेताले दुई लाख पचास हजार नगद सहित ट्रफी मेडल पाउनेछ । प्रतियोगिताको सर्वोत्कृष्ट खेलाडीले पचास हजार, उत्कृष्ट गोलरक्षक १५ हजार, उत्कृष्टरक्षक १५ हजार, उत्कृष्ट फरवार्ड १५ हजार, सर्वाधिक गोलकर्ता १५ हजार, उदयमान खेलाडी १५ हजार, फेयर प्ले टिमलाई १५ हजार पुरस्कार दिईनेछ । प्रत्येक खेलको म्यान अफ द म्याचले नगद पाँच हजार सहित ट्रफी दिईने आयोजकले जनाएको छ । प्रतियोगितामा ७ वटा प्रदेशका टीमहरुको सहभागी छन् । प्रतियोगिता फागुन १४ गतेसम्म सञ्चालन हुनेछ ।
यो गौरीगंगा–११ स्पोर्टस क्लबको आयोजना र सुदूरपश्चिम खेलकुद परिषद्को तत्वाधानमा जयपृथ्वीबहादुर सिंह गौरीगंगा राष्ट्रिय फुटबल प्रतियोगिताको पाँचौं संस्करण हो ।
