अछाम- नेपाली कम्युनिष्ट पार्टी ( नेकपा) बाट प्रतिनिधि सभा सदस्य निर्वाचनका लागि उम्मेदवार बनेका नेता डा. भीम रावलले झुटमाथि झुट बोल्न थालेका छन् । उनी समर्थक पक्षहरूले पार्टीमै प्रवेश नगरेका व्यक्तिलाई पार्टीमा समाहित भएको भन्दै झुटको खेती गरेका हुन् ।
चुनावी घरदैलो अभियानका क्रममा एकगाउँमा पुगेका नेकपाका उम्मेदवार रावल पक्षले एमाले नेता श्याम रावललाई आफ्नो पार्टीमा प्रवेश गरेको भन्दै भ्रम फैलाएको देखिन्छ ।
माघ १७ गते रावलको टोली प्रचारप्रसारका क्रममा एक स्थानीय टोलमा पुगेको बेला केही स्थानीयले स्वागत गरेको विषयलाई लिएर सामाजिक सञ्जालमा पार्टी प्रवेश गरिएको भन्दै पोस्टहरू सार्वजनिक भएका थिए।
यस विषयमा सामाजिक सञ्जालमार्फत प्रतिक्रिया जनाउँदै रावलले आफूलाई बदनाम गर्ने उद्देश्यले गलत प्रचार गरिएको बताएका छन्। उनले आफ्नो गाउँ-टोलमा आएका अतिथिलाई स्वागत गर्नु सामान्य सामाजिक संस्कार भएको उल्लेख गर्दै त्यसलाई पार्टी प्रवेश भनेर प्रचार गर्नु गलत र भ्रामक भएको दाबी गरेका छन्।
श्याम रावलका अनुसार उनले कुनै दल परिवर्तन नगरेको स्पष्ट पारेका छन्। उनी हाल पनि नेकपा (एमाले) अछाम जिल्ला कमिटी सदस्य रहेको बताएका छन्।
उनले यस्ता भ्रामक समाचार र आरोपहरूले आफ्नो चरित्र हत्या भएको भन्दै यस्ता भ्रम नफैलाउन सबैलाई आग्रह गरेका छन्।
यस घटनाले अछाम क्षेत्र नं. १ मा चुनावी माहोल थप तातेको देखिएको छ।